తెలంగాణ ఐటీ శాఖ మంత్రి కేటీఆర్ నెటిజన్లపై ఒకింత ఆగ్రహం వ్యక్తం చేశారు. సినిమాలపై అభిప్రాయాలను పంచుకోవడం, ప్రొఫైల్ పిక్చర్ మార్చడంపై ట్విట్టర్లో కొంత మంది ఆయణ్ని తప్పుబడుతూ కామెంట్లు పెడుతున్నారు. దీనిపై కేటీఆర్ దీటుగా బదులిచ్చారు.
‘నేను సినిమాలు చూస్తున్నానని, ప్రొఫైల్ పిక్చర్లు మారుస్తున్నానని ఎవరైతే కామెంట్లు చేస్తున్నారో వారందరికీ ఒక్కటే చెప్పదలుచుకున్నా.. ఏదన్నా పనిచూసుకోండి. మంత్రినే అయినా నాకంటూ కొన్ని ఇష్టాయిష్టాలు ఉంటాయి. అవన్నీ మీకు నచ్చకపోతే నిరభ్యంతరంగా నన్ను ట్విటర్లో అన్ఫాలో అవొచ్చు’ అని కేటీఆర్ ట్వీట్ చేశారు.కేటీఆర్.. శనివారం (ఫిబ్రవరి 10) రాత్రి ‘తొలిప్రేమ’ సినిమా చూసి బాగుందని అభినందిస్తూ చిత్ర బృందాన్ని ఉద్దేశించి ట్వీట్ చేశారు. దీన్ని కొందరు నెటిజన్లు తప్పుబట్టారు. ఆ తర్వాత ఆయన తన ప్రొఫైల్ ఫొటోను మార్చుకోగా.. దానిపైనా కొంత మంది విమర్శలు గుప్పించారు. దీంతో తన ట్వీట్లపై కామెంట్లు చేస్తున్నవారికి కేటీఆర్ గట్టిగా బదులిచ్చారు.