ఇద్దరు ఆప్ ఎమ్మెల్యేలకు జుడిషియ‌ల్ కస్టడీ
Telangana Telugu | Suryaa Desk | Published : Thu, Feb 22, 2018, 10:58 AM
ఢిల్లీ ప్రధాన కార్యదర్శి అన్షు ప్రకాశ్‌పై దాడి చేసిన కేసులో ఇద్దరు ఆప్ ఎమ్మెల్యేలకు ఢిల్లీ కోర్టు గురువారం వరకూ జ్యుడిషియల్‌ కస్టడీ విధించింది. ఇద్దరు ఎమ్మెల్యేలు అమాన్‌తుల్లా ఖాన్‌, ప్రకాష్‌ జార్వల్‌ బెయిల్‌ పిటిషన్‌ను గురువారం కోర్టు విచారించనుంది. ప్రకాష్‌ జార్వల్‌ను మంగళవారం రాత్రి అరెస్టు చేయగా, అమాన్‌తుల్లాను బుధవారం మధ్యాహ్నం అదుపులోకి తీసుకున్నారు. బుధవారం విచారణలో ముందుగా కోర్టు ఎమ్మెల్యేల కస్టడీ కోరుతూ పోలీసులు దాఖలు చేసిన పిటిషన్‌ను కొట్టివేసింది. ఎమెల్యేలు విచారణకు సిద్దంగా వున్నారని మెట్రోపాలిటిన్‌ మేజిస్ట్రేట్‌ షెఫలీ బర్నాలా తెలిపారు. భారీ బందోబస్తు మధ్య ఇద్దరు ఎమ్మెల్యేలను కోర్టులో ప్రవేశపెట్టారు. కోర్టు వద్దకు ఆప్ కార్యకర్తలు, న్యాయవాదులు భారీ సంఖ్యలో చేరుకున్నారు.
ఢిల్లీ సిఎం అరవింద్ కేజ్రీవాల్‌ సమక్షంలోనే ఆప్ ఎమ్మెల్యేలు తనపై దాడికి పాల్పడ్డారని అన్షు ప్రకాశ్‌ ఆరోపిస్తున్న సంగతి తెలిసిందే. అయితే అయన ఆరోపణలను ఆప్ ఎమ్మెల్యేలు ఖండిస్తున్నారు. బీజేపీ ఆదేశాల మేరకు అన్షు ప్రకాష్‌ పని చేస్తున్నారని, ఈ కారణంతో ఆప్ ప్రభుత్వాన్ని రద్దు చేయాలని చూస్తున్నారని అమాన్‌తుల్లా ఖాన్‌ తెలిపారు. ముందస్తు ప్రణాళికతో ఆప్ కార్యకర్తలు తనపై దాడికి పాల్పడ్డారని ప్రధాన కార్యదర్శి అన్షు ప్రకాష్‌ తన ఫిర్యాదులో పేర్కొన్నారు.
|
|
