టీ20 సిరీస్.. నేడే లంకతో భారత్ ఢీ
Telangana Telugu | Suryaa Desk | Published : Tue, Mar 06, 2018, 09:25 AM
శ్రీలంక వేదికగా మంగళవారం నుంచే ముక్కోణపు టీ20 సిరీస్ ఆరంభంకాబోతోంది. ఆతిథ్య శ్రీలంకను భారత్ జట్టు కొలంబో వేదికగా ఈ రోజు రాత్రి 7 గంటలకి తొలి మ్యాచ్‌లో ఢీకొట్టనుంది. కెప్టెన్ విరాట్ కోహ్లి, మహేంద్రసింగ్ ధోని, హార్దిక్ పాండ్య, జస్‌ప్రీత్ బుమ్రా, భువనేశ్వర్ కుమార్, కుల్దీప్ యాదవ్‌ తదితరులకి విశ్రాంతినిచ్చిన నేపథ్యంలో.. జట్టులోకి వచ్చిన కొత్త కుర్రాళ్లు ఎలాంటి ప్రదర్శన ఇస్తారోనని సర్వత్రా ఆసక్తి నెలకొంది. ముఖ్యంగా.. ధోనీ స్థానంలో జట్టులోకి వచ్చిన రిషబ్ పంత్‌పై ఇప్పుడు అందరి దృష్టి నిలిచింది.
ఈ టీ20 సిరీస్‌లో భారత్‌తో పాటు శ్రీలంక, బంగ్లాదేశ్ జట్లు పోటీపడనున్నాయి. మూడు జట్లు ఒక్కో జట్టుతో రెండేసి మ్యాచ్‌లు ఆడతాయి. చివరిగా పాయింట్ల పట్టికలో తొలి రెండు స్థానాల్లో నిలచిన జట్లు మార్చి 18న ఫైనల్లో తలపడతాయి. విరాట్ కోహ్లికి విశ్రాంతినిచ్చిన నేపథ్యంలో రోహిత్ శర్మ.. ఈ టోర్నీలో భారత జట్టుని కెప్టెన్‌గా నడిపించనున్నాడు. జట్టులో ఎక్కువ మంది కుర్రాళ్లు ఉండటంతో.. రోహిత్ శర్మకి తుది జట్టు ఎంపిక సవాల్‌కానుంది.
భారత జట్టు: రోహిత్ శర్మ (కెప్టెన్), శిఖర్ ధావన్ (వైస్ కెప్టెన్), కేఎల్ రాహుల్, సురేశ్ రైనా, మనీశ్ పాండే, దినేశ్ కార్తీక్ (వికెట్ కీపర్), దీపక్ హుడా, వాషింగ్టన్ సుందర్, చాహల్, అక్షర్ పటేల్, విజయ్ శంకర్, శార్ధూల్ ఠాకూర్, జయదేవ్ ఉనద్కత్, మహ్మద్ సిరాజ్, రిషబ్ పంత్ (వికెట్ కీపర్)
|
|
