బెలూన్లు ఎగురవేసిన మహిళా ఎంపీలు
Telangana Telugu | Suryaa Desk | Published : Thu, Mar 08, 2018, 12:51 PM
న్యూఢిల్లీ: అంతర్జాతీయ మహిళా దినోత్సవం సందర్భంగా ఇవాళ మహిళా ఎంపీలు పార్లమెంట్ ఆవరణలో ఉన్న గాంధీ విగ్రహం ముందు బెలూన్లు ఎగరవేశారు. ఇక రాజ్యసభలో చైర్మన్ వెంకయ్యనాయుడు.. మహిళామణులకు శుభాకాంక్షలు తెలిపారు. ఆ తర్వాత రాజ్యసభ మహిళా ఎంపీలు మాట్లాడారు. మహిళా రిజర్వేషన్ బిల్లు ఇంకా పెండింగ్‌లో ఉందని సీనియర్ కాంగ్రెస్ నేత అంబికా సోనీ అన్నారు. మేమంతా మహిళలతో కలిసే ఉన్నామని కనీసం తీర్మానం ఎందుకు చేయరని ఆమె ప్రశ్నించారు. మహాత్మా గాంధీ ఆశయాలను ఇంకా తీర్చలేకపోయామని మరో ఎంపీ రేణుకా చౌదరి అన్నారు. మహిళా బిల్లుకు ఆమోదం దక్కాలంటే రాజకీయ విశ్వాసం ఉండాలన్నారు. పని ప్రదేశాల్లో మహిళలకు అవకాశం దక్కకపోవడం వల్ల ఒకశాతం జీడీపీ కోల్పోతున్నామని ఆమె అన్నారు. సమాన హక్కుల కోసం కమిషన్ ఏర్పాటు చేయాలని ఎంపీ కుమారి సెల్జా డిమాండ్ చేశారు. పంచాయతీల్లో మహిళలు మెరుగ్గా రాణిస్తున్నారని, అలాగే పార్లమెంట్‌లోనూ వాళ్లకు అవకాశాలు కల్పించాలని ఎంపీ రజనీ పటేల్ తెలిపారు. రిజర్వేషన్ల వల్లే మహిళలు పంచాయతీల్లో రాణిస్తున్నారని బీజేపీ ఎంపీ సంపతీయ ఉకే అన్నారు. విదేశాంగశాఖ, రక్షణ శాఖలకు మహిళా మంత్రులు ఉన్నట్లు ఆమె గుర్తు చేశారు.
|
|
