బౌలర్ మహ్మద్ షమీకి మద్దతుగా నిలిచిన ధోని
Telangana Telugu | Suryaa Desk | Published : Tue, Mar 13, 2018, 09:14 AM
మహిళలతో వివాహేతర సంబంధాలు, ఫిక్సింగ్, హత్యాయత్నం, గృహహింస తదితర ఆరోపణలతో ఉక్కిరిబిక్కిరి అవుతున్న భారత ఫాస్ట్ మహ్మద్ షమీకి మాజీ కెప్టెన్ మహేంద్రసింగ్ ధోనీ నుంచి ఊహించని మద్దతు లభించింది. తనకు తెలిసిన మహ్మద్ షమీ అలాంటోడు కాదని.. చాలా గొప్ప వ్యక్తి అంటూ ‘కెప్టెన్ కూల్’ కితాబిచ్చాడు. గత వారం నుంచి మహ్మద్ షమీపై అతని భార్య హసీన్ జాహన్ తీవ్ర ఆరోపణలు చేస్తూ.. రెండు రోజుల క్రితం కోల్‌కతా పోలీసులకి కూడా ఫిర్యాదు చేసిన విషయం తెలిసిందే. ఈ ఆరోపణల నేపథ్యంలో మహ్మద్ షమీ.. బీసీసీఐ నుంచి వార్షిక కాంట్రాక్ట్‌ని కోల్పోవడంతో పాటు.. ఐపీఎల్‌లో అతను ప్రాతినిథ్యం వహించనున్న ఢిల్లీ డేర్‌డెవిల్స్‌కి ఆడటం కూడా అనుమానంగానే కనిపిస్తోంది.
మహ్మద్ షమీ గురించి గత వారం రోజుల నుంచి చాలా వార్తలు వస్తున్నాయి. అయితే.. అవన్నీ అతని వ్యక్తిగత జీవితానికి సంబంధించినవి. అందుకే వాటిపై నేను వ్యాఖ్యానించకూడదు. కానీ.. సుదీర్ఘకాలంగా నాకు తెలిసిన మహ్మద్ షమీ మాత్రం అలాంటోడు కాదు. అతను చాలా గొప్ప వ్యక్తి. భార్యని వంచించడం, దేశాన్ని మోసం చేయడం లాంటివి అతను చేయకపోవచ్చు’ అని ధోనీ అభిప్రాయపడ్డాడు. పాకిస్థాన్‌కి చెందిన మహిళతో కలిసి దుబాయ్‌లో ఒక రోజు గడిపిన షమీ.. ఆమె వద్ద నుంచి పెద్ద మొత్తంలో డబ్బులు కూడా తీసుకున్నట్లు హసీన్ జాహన్ ఆరోపించింది. బహుశా మ్యాచ్‌లు ఫిక్సింగ్ చేశాడేమో..? విచారిస్తే తెలుస్తుందని ఆమె ఆరోపించడం సంచలనంగా మారిన విషయం తెలిసిందే.
|
|
