బడ్జెట్ కేటాయింపులపై పెదవి విరిచిన ఆర్మీ

కేంద్ర బడ్జెట్‌లో రక్షణ రంగానికి కేటాయింపులపై ఆర్మీ తీవ్ర అసంతృప్తి వ్యక్తం చేసింది. రక్షణ శాఖకు కేటాయించిన నిధులపై తన అసంతృప్తిని వ్యక్తం చేస్తూ పార్లమెంటరీ కమిటీకి ఆర్మీ ఉన్నతాధికారులు ఫిర్యాదు చేశారు. సాధారణంగా సైన్యం వద్ద 30 శాతం అత్యాధునిక ఆయుధాలు, 40 శాతం ప్రస్తుత కాలానికి చెందినవి, మరో 30 శాతం పాత ఆయుధాలు ఉండాలి... కానీ, ఇండియన్ ఆర్మీ వద్ద అత్యాధునిక ఆయుధాలు కేవలం 8 శాతం, ప్రస్తుత తరానికి చెందినవి 24 శాతం ఉంటే, 68 శాతం పాత ఆయుధాలేనని ఆర్మీ వైస్-చీఫ్ లెఫ్టినెంట్ జనరల్ శరత్ చంద్ పేర్కొన్నారు. సరిహద్దుల్లో పాక్‌తో నిరంతరం పోరాటాలతోపాటు గతేడాది డోక్లామ్ విషయంలో చైనాతో ఉద్రిక్తతలు చోటుచేసుకున్నాయి... ఇలాంటి సమయంలో రెండు దేశాలతో యుద్ధం చేయడం ఆర్మీకి ప్రమాదంగా పరిణమించిందని పేర్కొన్నారు.

ఆర్మీని ఆధునికరించాలన్న మా ఆశయాన్ని 2018-19 బడ్జెట్ కేటాయింపులు నీరుగార్చాయి... ఇప్పటి వరకు మేం సాధించిన దానికి ఎదురుదెబ్బ తగిలింది.. ఆర్మీ ఆధునికీకరణకు కేటాయించిన రూ.21,338 కోట్లు ఏ మూలకు సరిపోవంటూ కమిటీకి రాసిన లేఖలో పేర్కొన్నారు. ఉరి ఉగ్రదాడి తర్వాత అత్యవసర ఆయుధాల కొనుగోలు కోసం ప్రారంభించిన 125 ప్రాజెక్టులకు అయ్యే ఖర్చు రూ.29,033 కోట్లు అయితే, ప్రస్తుత కేటాయింపులు కనీస చెల్లింపులకు కూడా సరిపోవని అందులో తెలిపారు. అలాగే చైనాతో సరిహద్దుల వెంబడి రహదారులు, మౌలికవసతుల అభివృద్ధి లాంటి కార్యక్రమాలకు నిధులు కూడా లేవని.. బడ్జెట్‌లో అరకొర కేటాయింపులు వల్ల తీవ్ర ఇబ్బందులు ఎదుర్కొంటున్నామని అన్నారు.

ప్రస్తుతం మేకిన్ ఇండియా కార్యక్రమంలో భాగంగా ప్రారంభించిన 25 ప్రాజెక్టులకు సరిపడా నిధులు లేకపోవడంతో ఇవి అర్థాంతరంగా నిలిచిపోయే పరిస్థితి తలెత్తిందని జనరల్ శరత్ చంద్ అన్నారు. వైమానిక, నౌకదళానికి చెందిన ఉన్నతాధికారులు సైతం ఇదే విధంగా పెదవి విరుస్తున్నారు. మొత్తంగా రక్షణ శాఖకు రూ.12,296 కోట్లు తక్కువయ్యాయని, మరోవైపు డోక్లామ్ వివాదం కొనసాగుతోందని ఆ లేఖలో వివరించారు. ప్రస్తుత బడ్జెట్‌లో రక్షణ రంగానికి రూ.2,79,511 కోట్లు కేటాయించింది. గతేడాదితో పోలిస్తే ఇది 7.81 శాతం అధికం.