2019లో బీజేపీకి 110 సీట్లే: శివసేన
Telangana Telugu | Suryaa Desk | Published : Fri, Mar 16, 2018, 02:20 PM
ముంబయి భారతీయ జనతా పార్టీ(బీజేపీ) నేతృత్వంలోని ఎన్డీఏ మిత్రపక్షమైన శివసేన కేంద్రంలో అధికారంలో ఉన్న బీజేపీపై చాలాసార్లు విమర్శలు గుప్పించిన విషయం తెలిసిందే. వచ్చే లోక్‌సభ ఎన్నికల్లో బీజేపీ 100-110 సీట్లకు పడిపోతుందని తాజాగా వెల్లడించింది. రెండు రోజుల క్రితం వెలువడిన ఉప ఎన్నికల ఫలితాలు, ప్రస్తుత పరిస్థితులను పరిశీలిస్తే ఇది స్పష్టమవుతుందని అంచనా వేసింది. వారం క్రితం వెల్లడైన ఈశాన్య రాష్ర్టాల అసెంబ్లీ ఫలితాల్లో సత్తాచాటి, త్రిపురలో ప్రభుత్వాన్ని ఏర్పాటు చేసి సంబరాలు చేసుకోవడంలో బిజీగా ఉన్నప్పటికీ గోరఖ్‌పూర్, ఫుల్‌పూర్‌లో వెలువడిన లోక్‌సభ ఉప ఎన్నికల ఫలితాల్లో అధికార బీజేపీని ఓడించి సమాజ్‌వాదీ పార్టీ అభ్యర్థులు గెలుపొందడంతో కమలం క్యాంపులో భయం మొదలైందని శివసేన తన అధికార పత్రిక సామ్నాలో వివరించింది. 2014లో ప్రజాదరణతో బీజేపీ విజయం సాధించిందని, ప్రస్తుతం వ్యతిరేక పవనాలు వీస్తున్నాయని అందులో పేర్కొంది. ప్రస్తుత పరిస్థితుల్లో ఒకటి మాత్రం స్పష్టమవుతోంది. అన్నింటికన్నా 2019లో బీజేపీ సంఖ్య 280 కాదు, ఆ సంఖ్య కనీసం 100-110కి తగ్గుతుంది అని హెచ్చరించింది.
|
|
