కేసీఆర్ కిట్ పథకం విజయవంతమైంది : లక్ష్మారెడ్డి
Telangana Telugu | Suryaa Desk | Published : Mon, Mar 19, 2018, 10:40 AM
హైదరాబాద్ : రాష్ట్ర ప్రభుత్వం ప్రతిష్టాత్మకంగా ప్రవేశపెట్టిన కేసీఆర్ కిట్ పథకం విజయవంతమైందని వైద్యారోగ్య శాఖ మంత్రి లక్ష్మారెడ్డి స్పష్టం చేశారు. శాసనసభలో ప్రశ్నోత్తరాల సందర్భంగా కేసీఆర్ కిట్‌పై సభ్యులు సంధించిన ప్రశ్నలకు మంత్రి సమాధానం ఇచ్చారు. కేసీఆర్ కిట్ పథకం అమల్లోకి వచ్చిన తర్వాత ప్రభుత్వ ఆస్పత్రుల్లో ప్రసవాల సంఖ్య గణనీయంగా పెరిగిందన్నారు. ఇప్పటి వరకు 4 లక్షలకు పైగా గర్భిణీలు కేసీఆర్ కిట్ కింద లబ్ది పొందారు. కేసీఆర్ కిట్‌కు నిధులను పూర్తి స్థాయిలో ఇప్పటి వరకు రాష్ట్ర ప్రభుత్వమే భరించిందని స్పష్టం చేశారు. దీనికి కేంద్ర నిధులు ఉపయోగించలేదని పేర్కొన్నారు. ప్రసవం అయిన తర్వాత తల్లీబిడ్డను సురక్షితంగా వారి ఇంటికి తరలించేందుకు రాష్ట్ర వ్యాప్తంగా 241 అమ్మ ఒడి వాహనాలను ప్రవేశపెట్టడం జరిగిందన్నారు. ప్రాథమిక ఆరోగ్య కేంద్రాలను ఆధునీకరిస్తున్నామని తెలిపారు. ప్రభుత్వ ఆస్పత్రుల్లో సౌకర్యాలను మెరుగుపరిచామని చెప్పారు. ప్రభుత్వ ఆస్పత్రుల్లో బెడ్ల సంఖ్యను పెంచుతాం. ఖానాపూర్ ఆస్పత్రిని మెరుగుపరుస్తున్నామని తెలిపారు. వైద్యారోగ్య శాఖలో రెగ్యులర్ ప్రతిపాదికన దాదాపు 10 వేల పోస్టులను ప్రకటించాం. ఈ పోస్టులను టీఎస్‌పీఎస్సీ ద్వారా పోస్టుల నియామకం జరుగుతుందని మంత్రి తెలిపారు.
|
|
