భద్రాచలంలో వైభవంగా ఎదుర్కోళ్ల ఉత్సవం
Telangana Telugu | Suryaa Desk | Published : Mon, Mar 26, 2018, 08:58 AM
భద్రాద్రి కొత్తగూడెం: భద్రాది సీతారామచంద్రస్వామి ఆలయంలో ఎదుర్కోళ్ల ఉత్సవం వైభవంగా జరిగింది. మిథిలా స్టేడియం దగ్గర సీతారాములకు ఎదుర్కోళ్ల ఉత్సవం జరిగింది. ఈ ఉత్సవానికి భక్తులు భారీగా తరలివచ్చారు. ఇక.. మరోవైపు రేపు జరగబోయే సీతారాముల కల్యాణోత్సవానికి భద్రాచలం ముస్తాబైంది. విద్యుత్ దీపకాంతులతో రామాలయం శోభిల్లుతున్నది. వరుడు బంధువులతో వచ్చే సమయంలో పొలిమేర నుంచి కన్యదాత స్వాగతం పలికే వేడుకే ఎదుర్కోలు. ప్రధాన కల్యాణ మూర్తులు గిరి ప్రదర్శనగా వైకుంఠ మండపానికి వేంచేశారు. ఆ మండపం వేదికపై సీతారాములను ఉంచారు. భద్రాద్రిలో సోమవారం జరిగే శ్రీసీతారాముల కల్యాణ మహోత్సవానికి సంబంధించిన శుభలేఖను వేద పండితులు చదివి భక్తులకు వినిపించారు. స్వామివారికి వస్త్ర సమర్పణ కాగానే అందరిపై గులామ్ రంగును చల్లారు. ఇది చాలా వినోదభరితంగా సాగింది. అనంతరం స్వామివారు తిరువీధిసేవకు బయలుదేరారు. భక్తులు ఈ వధూవరులను చూసి తరించారు. సీతారాముల గుణగణాలను, ఇరువంశాల విశిష్టతను పండితులు వివరించారు.
|
|
