గాలి జనార్ధన్ రెడ్డి వర్సెస్ డీకే శివకుమార్

కర్ణాటకలో క్యాంపు రాజకీయాలు జోరందుకున్నాయి. అసెంబ్లీ ఎన్నికల ఫలితాల్లో భారతీయ జనతా పార్టీ కనీస మెజారిటీకి దగ్గర దగ్గరగా వచ్చి ఆగిపోవడం, ఎన్నికల్లో ప్రత్యర్థులుగా పోరాడిన జేడీఎస్, కాంగ్రెస్ పార్టీలు చేతులు కలపడంతో రాజకీయాలు రసవత్తరంగా మారాయి. అయితే వచ్చిన అవకాశాన్ని వదులుకోకుండా బీజేపీ వాళ్లు యడ్యూరప్ప చేత ప్రమాణస్వీకారం చేయించారు. గవర్నర్ తమ వాడే కావడంతో కమలం పార్టీ ఈ గేమ్‌ను చాకచక్యంగా నడుపుతోందనే విమర్శ రానే వస్తోంది. అయితే సింగిల్ లార్జెస్ట్ పార్టీగా బీజేపీ నిలుస్తుండటంతో ముఖ్యమంత్రిగా యడ్యూరప్ప చేత ప్రమాణస్వీకారం చేయించడం కొంత వరకూ సబబుగానే కనిపిస్తోంది. 

ప్రభుత్వాన్ని నిలుపుకోవడానికి బీజేపీకి ఎనిమిది మంది ఎమ్మెల్యేల అదనపు మద్దతు అవసరం. ఈ నేపథ్యంలో ఒక ఇండిపెండెంట్‌ను బీజేపీ దారికి తెచ్చుకుంది. అలాగే ఒక కాంగ్రెస్ ఎమ్మెల్యే కూడా ఇప్పటికే బీజేపీ కూటమిలోకి చేరిపోయినట్టుగా వార్తలు వస్తున్నాయి. ఇంకా మరో ఆరు మంది మద్దతు అవసరం ఉన్నట్టుగా తెలుస్తోంది. ఈ నేపథ్యంలో సంప్రదింపులు జరుగుతూ ఉన్నాయని వార్తలు వస్తున్నాయి. 

ఈ సంప్రదింపుల్లో భారతీయ జనతా పార్టీ తరఫు నుంచి గాలి జనార్ధన్ రెడ్డి కీలక పాత్ర పోషిస్తున్నట్టుగా వార్తలు వస్తున్నాయి. ఏపీతో సరిహద్దును పంచుకునే ప్రాంతాల నుంచి కాంగ్రెస్ పార్టీ తరఫున నెగ్గిన ఎమ్మెల్యేలతో గాలి సంప్రదింపులు జరుపుతున్నట్టుగా తెలుస్తోంది. ఎమ్మెల్యేలు డైరెక్టుగా అందుబాటులో లేరు. ఈ నేపథ్యంలో వారి సన్నిహితుల ద్వారా వర్తమానాలు పంపిస్తున్నట్టుగా సమాచారం. సీనియర్లు అయిన ఎమ్మెల్యేలకు మంత్రి పదవులు ఇస్తామనే హామీలతో ఆకట్టుకునేందుకు ప్రయత్నాలు సాగుతున్నట్టుగా వార్తలు వస్తున్నాయి. 

ఇటువైపు నుంచి గాలి జనార్దన్ రెడ్డి, శ్రీరాములు సంప్రదింపుల్లో కీలక పాత్ర పోషిస్తుండగా, కాంగ్రెస్ కూటమిని రక్షించే బాధ్యత తీసుకున్నాడట మాజీ మంత్రి డీకే శివకుమార. కనకపుర నుంచి ఎమ్మెల్యేగా నెగ్గిన డీకే దేశంలోనే అత్యంత ధనిక రాజకీయ నేతల్లో ఒకరిగా పేరు పొందాడు. ఇటీవల తన ఎన్నికల అఫిడవిట్‌లో 720 కోట్ల రూపాయల ఆస్తులున్నట్టుగా పేర్కొన్నారీయన. డీకే శివకుమారకు లాబీయింగ్‌లో మంచి పట్టుందని పేరు. ఈ నేఫథ్యంలో కాంగ్రెస్ పార్టీ, జేడీఎస్ ఎమ్మెల్యేలు ఎవరూ చేజారకుండా వారిని కూటమిలోనే నిలుపుతూ.. బీజేపీకి సవాల్‌గా మారాడట ఈయన. ఫలితాలు రాగానే గెలిచిన ఒక ఇండిపెండెంట్ ఎమ్మెల్యేలను పిలిపించుకుని తన ఇంట్లో పెట్టి తలుపులు వేశాడు డీకే. ఆ ఎమ్మెల్యేను కాంగ్రెస్ వాళ్లు తమ క్యాంపుకు తరలిస్తున్నట్టుగా వార్తలు వస్తున్నాయి.