మిక్సీలో 1.2 కేజీల బంగారం
Telangana Telugu | Suryaa Desk | Published : Fri, Jul 14, 2017, 10:25 AM
బంగారం స్మగ్లర్లు ఏ స్థాయిలో తెలివి మీరిపోయారో చెప్పేందుకు ఇదే అద్భుతమైన ఘటన. విదేశాల నుంచి దొంగ బంగారాన్ని నగరానికి తీసుకురావడానికి ఎన్ని ఎత్తుగడలు వేస్తున్నారో ఈ ఘటనను చూస్తే అర్థమైపోతుంది. చూస్తే అది మామూలు మిక్సీలానే ఉంది. కానీ దాన్ని విప్పితే గానీ తెలియలేదు.. అదో బంగారు భాండాగారమని! మిక్సీ లోపల ఉన్న మోటార్ చుట్టూ కరిగించిన బంగారాన్ని అమర్చి దుబాయ్ నుంచి నగరానికి స్మగ్లింగ్ చేయడానికి ఓ మహిళ ప్రయత్నించి దొరికిపోయింది. ఇంతకీ ఆ బంగారం ధరెంతో తెలుసా అక్షరాల రూ. 45 లక్షలు. విదేశాల నుంచి బంగారం స్మగ్లింగ్ అవుతున్నట్టుగా సమాచారం అందుకున్న రెవెన్యూ ఇంటెలిజెన్స్‌(డీఆర్‌ఐ) హైదరాబాద్‌ జోన్‌ యూనిట్‌ అధికారులు గురువారం మధ్యాహ్నం శంషాబాద్‌ రాజీవ్‌గాంధీ అంతర్జాతీయ విమానాశ్రయంలో తనిఖీలు చేపట్టారు. దుబాయ్ నుంచి ఇతిహాద్‌ ఫ్లైట్‌‌లో దిగిన మహిళ అనుమానాస్పదంగా ఉండటాన్ని గుర్తించారు. ఆమె వద్ద మూడు జార్ల మిక్సీని పరిశీలించారు. అనుమానం వచ్చిన అధికారులు.. స్క్రూ డ్రైవర్‌తో మిక్సీని ఏ పార్టుకు ఆ పార్టుగా విప్పదీసి చూశారు. మిక్సీ మోటారు చుట్టూ బంగారం. దాన్ని వేరుచేసి తూకం వేస్తే 1.29 కేజీలుగా తేలింది. ఆ బంగారాన్నంతా సీజ్‌ చేసి, మహిళను అరెస్ట్‌ చేసినట్లు డీఆర్‌ఐ అడిషనల్‌ డైరెక్టర్‌ జనరల్‌ ఎం.కె.సింగ్‌ తెలిపారు.
|
|
