శ్రీలంకతో తొలిటెస్టుకి కేఎల్ రాహుల్ దూరం..?
Telangana Telugu | Suryaa Desk | Published : Mon, Jul 24, 2017, 12:27 PM
శ్రీలంకతో తొలి టెస్టుకి ముందే భారత్ జట్టుకి వరుసగా ఎదురుదెబ్బలు తగులుతున్నాయి. ఇప్పటికే గాయం కారణంగా రెగ్యులర్ టెస్టు ఓపెనర్ మురళీ విజయ్ జట్టుకి దూరమవగా.. జ్వరం కారణంగా మరో ఓపెనర్ కేఎల్ రాహుల్ తొలి టెస్టుకి దూరంగా ఉండనున్నట్లు వార్తలు వస్తున్నాయి. ఇటీవల ముగిసిన వార్మప్ మ్యాచ్లో అర్ధశతకంతో ఫామ్లోకి వచ్చిన రాహుల్ తీవ్ర జ్వరం కారణంగా జట్టుతో కలిసి గాలేకి వెళ్లకుండా కొలంబోలోనే ఉండిపోయాట. గాలే స్టేడియం వేదికగా తొలి టెస్టు బుధవారం ఆరంభంకానుంది. అనంతరం ఆగస్టు 3 నుంచి కొలంబో వేదికగా రెండో టెస్టు జరగనుంది.
ఈ ఏడాది ఆస్ట్రేలియాతో ముగిసిన టెస్టు సిరీస్లో గాయపడిన కేఎల్ రాహుల్.. భుజానికి శస్త్ర చికిత్స చేయించుకున్నాడు. దీంతో ఐపీఎల్, ఛాంపియన్స్ ట్రోఫీకి దూరమై దాదాపు నాలుగు నెలలు విశ్రాంతి తీసుకున్నాడు. అనంతరం శ్రీలంకతో మూడు టెస్టుల సిరీస్కి ఎంపికైన రాహుల్.. ఇటీవల ముగిసిన వార్మప్ మ్యాచ్లో కేవలం 58 బంతుల్లో 7 ఫోర్ల సాయంతో
54 పరుగులు చేసి మునుపటి ఫామ్ అందుకున్నాడు. కానీ.. అనారోగ్యం అతడ్నితొలి టెస్టుకి దూరం చేస్తోంది. ఇప్పటికే మురళీ విజయ్ స్థానంలో శిఖర్ ధావన్కి అవకాశం కల్పించిన సెలక్టర్లు.. కేఎల్ రాహుల్ స్థానాన్ని ఎవరితో భర్తీ చేస్తారో చూడాలి.
|
|
