హైదరాబాద్‌లో ఎక్కడైనా పార్కింగ్ ఫ్రీ!

హైదరాబాద్‌లో వాహనదారులకు తీపి కబురు. రాజధానిలో పార్కింగ్ రుసుం దందా ఎంత అడ్డగోలుగా సాగుతోందో అందరికీ తెలిసిందే. దీనికి అడ్డుకట్ట వేసేందుకు తెలంగాణ ప్రభుత్వం చర్యలు చేపట్టింది. ఇకపై హైదరాబాద్‌లో ఎక్కడైనా ఉచితంగా పార్కింగ్ చేసుకునే సదుపాయాన్ని కల్పించనుంది. సోమవారం పురపాలక మంత్రి కె.తారకరామారావు సమక్షంలో జరిగిన సమావేశంలో ఈ మేరకు కీలక నిర్ణయం తీసుకున్నారు. మాల్స్, థియేటర్లు, వాణిజ్య సముదాయాలు, హోటళ్లు, కళ్యాణ మండపాలు, పరిశ్రమల భవనాల్లో ఉచిత పార్కింగ్‌ను తప్పనిసరి చేయనున్నారు. అలాగే వాటిలో పార్కింగ్‌కు ఎలాంటి ఫీజు వసూలు చేయరాదని నిర్ణయించారు. దీనికి సంబంధించి త్వరలో అధికారిక ఉత్తర్వులు ఇవ్వనున్నారు.

నగరంలో పార్కింగ్‌ దందాపై ప్రజల నుంచి పెద్ద ఎత్తున విమర్శలు వెల్లువెత్తుతున్నాయి. 10 రూపాయల సరుకు కొనడానికి వెళ్లినా పార్కింగ్ కోసం రూ.20 నుంచి రూ.50 చెల్లించాల్సి వస్తోంది. ఈ దోపిడీపై కొందరు పోలీస్‌ స్టేషన్లను ఆశ్రయించారు. వీటిని పరిగణనలోకి తీసుకున్న ప్రభుత్వం తాజా నిర్ణయం తీసుకుంది. ఆయా వాణిజ్య సంస్థల్లో కొనుగోళ్లకు వెళ్లిన వారికే ఈ ఉచిత సదుపాయం కల్పించనున్నారు. సినిమా థియేటర్లకు వెళ్లే వారు పార్కింగ్ ఫీజు చెల్లించకుండా సినిమా టికెట్‌ను చూపిస్తే సరిపోతుంది. ఈ విధానాన్ని నగరంతోపాటు రాష్ట్రంలోని అన్ని కార్పొరేషన్లలో అమలు చేయనున్నారు.

అయితే రైల్వే స్టేషన్లు, ఆర్టసీ బస్టాండ్ల పార్కింగ్ ఫీజులపై స్పష్టత లేదు. ప్రైవేట్‌ వాణిజ్య సంస్థలే ఉచిత పార్కింగ్‌ కల్పిస్తున్నప్పుడు ఆర్టీసీ, రైల్వే, మెట్రో రైలు స్టేషన్లలోనూ ఫ్రీ పార్కింగ్‌ కల్పించాలనే డిమాండ్‌ వినిపిస్తోంది. రైల్వే ప్లాట్‌ఫారం టికెట్‌ కొనుగోలు చేసినవారు దాన్ని చూపితే సరిపోయేలా చర్యలు తీసుకోవలంటున్నారు. ఆర్టీసీ బస్టాండ్లలో రోజుల తరబడి పార్కింగ్‌ చేయకుండా ఉండేలా తగిన విధానాలు రూపొందించాలనే అభిప్రాయం వ్యక్తమవుతోంది. మరోవైపు కమ్యూనిటీ పార్కింగ్ విధానం కూడా ప్రతిపాదనల్లో ఉంది. షాపింగ్‌ కాంప్లెక్స్‌లు, వాణిజ్య ప్రాంతాలు ఎక్కువగా ఉన్న చోట ఖాళీ ప్రాంతాన్ని గుర్తించి, కమ్యూనిటీ పార్కింగ్‌ ప్రాంతంగా ప్రకటించనున్నారు.