బూతు సైట్లతో లక్షల సంపాదన

హీరోయిన్ల ఫొటోలను మార్ఫింగ్ చేయడం, నగ్న శరీరాలకు హీరోయిన్ల తలలు అతికించడం, హీరోయిన్లు శృంగారంలో ఉన్నట్టుగా ఫొటోలను డిజైన్ చేయడం, అత్యంత అసభ్యమైన రీతిలో వాటిని తయారు చేయడం.. స్థూలంగా ఇదే అతడి వ్యాపారం. ఆన్‌లైన్‌ను కేంద్రంగా చేసుకుని, వెబ్‌సైట్ లను రూపొందించి.. అనునిత్యం అలాంటి ఫొటోలను పోస్టు చేస్తూ లక్షలు గడించాడు అతడు. ఒకటి కాదు ఏకంగా మూడు వెబ్‌సైట్లను నడుపుతూ డబ్బు గడించసాగాడు. మరే ఉద్యోగం కూడా అవసరం లేకుండా ఆన్‌లైన్ యాడ్స్ ద్వారానే డబ్బు గడిస్తూ.. అశ్లీల వెబ్‌సైట్లను నడపడమే వృత్తిగా మార్చుకున్నాడు. అతడి పేరు దాసరి ప్రదీప్. ఇటీవల మూవీ ఆర్టిస్ట్స్ అసోషియేషన్ ఫిర్యాదుతో సైబర్ క్రైమ్ పోలీసులు అదుపులోకి తీసుకున్న వ్యక్తి అతడు.

వెబ్‌సైట్లను నడిపితే డబ్బు వస్తుంది. వీక్షకులను ఆకట్టుకునే కంటెంట్ ఉంటే.. ఆన్‌లైన్ నుంచినే యాడ్స్ వస్తాయి, వాటి ద్వారా డబ్బు వస్తుంది. ఈ విషయాన్ని గ్రహించిన అతడు.. వీక్షకులను ఆకట్టుకోవడానికి బూతుబొమ్మలను నమ్ముకున్నాడు. ఫొటోషాప్ టెక్నిక్స్ తో అశ్లీల చిత్రాలను తయారు చేసి.. వాటిని తన సైట్లలో ప్రదర్శించసాగాడు. ఇలాంటి బొమ్మలను వీక్షించడానికి ఉత్సాహం చూపే వారు ఇతడి సైట్లను సందర్శించడంతో ఇతడికి డబ్బు రావడం మొదలైంది.

గత మూడు సంవత్సరాలుగా ఇతడు ఈ విధమైన వ్యాపారంలో ఆరితేరిపోయాడని సైబర్ క్రైమ్ పోలీసులు తేల్చారు. ప్రతి వారానికి ఇతడి ఖాతాలో యాడ్స్ డబ్బు జమ అయ్యేదని వారు నిర్ధారించారు. ఒక్క సైట్ నుంచి వారానికి ఐదు వేల రూపాయలకు పైనే డబ్బు వచ్చేదని దాసరి ప్రదీప్ అధికారులకు చెప్పినట్టు సమాచారం. మూడు సైట్లను నిర్వహిస్తూ ప్రతి నెల చాలా డబ్బు సంపాదించానని... మూడేళ్లుగే ఇదే పనితో లక్షల రూపాయలు పొందినట్టుగా అతడు వివరించాడు.

ఎట్టకేలకూ ‘మా’ ఫిర్యాదుతో ప్రదీప్ ఆటకట్టైంది. ఇతడు నిర్వహిస్తున్న సైట్లతో మరి కొన్ని బూతు వెబ్ సైట్లపై ‘మా’ ఫిర్యాదు చేసింది. ఆ సైట్ల అడ్మిన్‌లందరి మీదా చర్యలు తీసుకుంటున్నారు సీఐడీ సైబర్ క్రైమ్ అధికారులు.