నేడు టీఆర్‌టీ నోటిఫికేషన్
Telangana Telugu | Suryaa Desk | Published : Sat, Oct 21, 2017, 10:04 AM
తెలంగాణలో నిరుద్యోగులకు శుభవార్త. ఎంతో కాలంగా ఎదురుచూస్తున్న ఉపాధ్యాయ నియామక పరీక్ష (టీఆర్‌టీ) నోటిఫికేషన్ శనివారం (అక్టోబర్ 21) వెలువడనుంది. దీని ద్వారా సుమారు 8,792 పోస్టులు భర్తీ చేయనున్నారు. ప్రకటన జారీ చేయడానికి తెలంగాణ పబ్లిక్‌ సర్వీస్‌ కమిషన్‌ (టీఎస్‌పీఎస్సీ) ఏర్పాట్లు పూర్తి చేసింది. పాత డీఎస్సీ తరహాలో ఒకే పరీక్ష నిర్వహించనున్నారు. ఎస్‌సీఈఆర్‌టీ.. శుక్రవారం ఉదయానికి సిలబస్‌ ఖరారు చేసి పాఠశాల విద్యాశాఖ ద్వారా టీఎస్‌పీఎస్సీకి అందించింది. ఈ సిలబస్‌ ఆధారంగా పరీక్ష ఉంటుంది.
సిలబస్‌లో పెద్దగా మార్పులు లేనట్లు తెలుస్తోంది. తెలంగాణ ఆవిర్భావం తర్వాత పాఠశాల విద్య సిలబస్‌లో తెలుగు, సోషల్‌ స్టడీస్‌లో తెలంగాణ అంశాలు చేర్చారు. టీఆర్‌టీ సిలబస్‌లో ఆ మేరకు వీటిపై మార్పులు ఉంటాయి.టీఆర్‌టీకి 4 లక్షల మంది అభ్యర్థులు హాజరయ్యే అవకాశాలు ఉన్నట్లు అధికారులు అంచనా వేశారు. రాష్ట్రపతి ఉత్తర్వుల ప్రకారమే అభ్యర్థి స్థానికతను నిర్ణయించనున్నారు. అంటే అభ్యర్థి నాలుగో తరగతి నుంచి పది వరకు.. వరసగా నాలుగేళ్లు ఎక్కడ చదివితే ఆ ప్రాంతం జిల్లా స్థానికత వర్తిస్తుంది.
|
|
