రంగారెడ్డి : శంషాబాద్లోని ఎయిర్పోర్టు బావార్చి హోటల్ వద్ద ఓ గుర్తు తెలియని వ్యక్తి హల్చల్ సృష్టించాడు. ఆ భవనం పైకెక్కిన వ్యక్తి.. కిందకు దూకుతానంటూ నానా హంగామా చేశాడు. దీంతో అక్కడున్న వారు అప్రమత్తమై భవనం పైకెక్కి అతడిని కాపాడేందుకు యత్నించారు. ఆ వ్యక్తి చేయి పట్టుకుని పైకి లాగేందుకు యత్నించినప్పటికీ.. కింది అంతస్తులోకి దూకేశాడు. కింది అంతస్తులో ఉన్న వ్యక్తులు.. అతడిని అదుపులోకి తీసుకుని పోలీసులకు అప్పగించారు. అయితే ఈ వ్యక్తి గత రాత్రి ఎయిర్పోర్టు రోడ్డులో అనుమానాస్పదంగా తిరుగుతున్నట్లు పోలీసులకు సమాచారం అందడంతో.. అతడిని అదుపులోకి తీసుకున్నారు. శుక్రవారం అర్ధరాత్రి శంషాబాద్ పోలీసు స్టేషన్ నుంచి ఆ వ్యక్తి తప్పించుకున్నాడు. మానసిక స్థితి సరిగ్గా లేకనే అతడు అలా ప్రవర్తిస్తున్నాడని పోలీసులు తెలిపారు.