కాంగ్రెస్ గూటికి టీఆర్ఎస్ ఎమ్మెల్సీ?

నిజామాబాద్ జిల్లాకు చెందిన టీఆర్ఎస్ ఎమ్మెల్సీ ఆర్.భూపతిరెడ్డిని పార్టీ నుంచి సస్పెండ్ చేసేందుకు అధిష్టానం రంగం సిద్ధం చేసింది. పార్టీ వ్యతిరేక కార్యకలాపాలకు పాల్పడుతున్నారనే కారణంతో భూపతిరెడ్డిని టీఆర్ఎస్ నుంచి సస్పెండ్ చేయాలని సొంత పార్టీ ప్రజాప్రతినిధులే తీర్మానం చేశారు. బుధవారం హైదరాబాద్‌లోని మంత్రి పోచారం శ్రీనివాస్‌రెడ్డి నివాసంలో నిజామాబాద్ జిల్లా ప్రజాప్రతినిధుల సమావేశం జరిగింది. ఈ సమావేశంలో మంత్రి పోచారం శ్రీనివాస్‌రెడ్డి, ఎంపీలు కవిత, బీబీ పాటిల్, ఎమ్మెల్యేలు, ఎమ్మెల్సీలు పాల్గొన్నారు. ఈ సమావేశంలో భూపతిరెడ్డి ప్రవర్తనపై ముఖ్యంగా చర్చించారు. ఆయనపై క్రమశిక్షణా చర్యలు తీసుకోవాలని సూచించారు. తెలంగాణలో టీఆర్ఎస్ అధికారంలోకి వచ్చిన తరవాత పార్టీకి చెందిన ఒక ఎమ్మెల్సీపై వేటుకు సొంత పార్టీ వారే సిఫారుసు చేయడం ఇదే తొలిసారి.

బాజిరెడ్డి vs భూపతిరెడ్డి
నిజామాబాద్ రూరల్ ఎమ్మెల్యే బాజిరెడ్డి గోవర్ధన్‌కు తెలియకుండా ఆయన నియోజకవర్గంలో ఎమ్మెల్సీ భూపతిరెడ్డి పర్యటిస్తున్నారనేది ప్రధాన ఆరోపణ. ఈ విషయంలో ఇప్పటికే బాజిరెడ్డి, భూపతిరెడ్డి మధ్య వార్ జరుగుతోంది. బాజిరెడ్డికి ఇబ్బంది కలిగిస్తూ ఆయనకు వ్యతిరేకంగా భూపతిరెడ్డి పనిచేస్తున్నట్లు నియోజకవర్గం టీఆర్ఎస్ ప్రజాప్రతినిధుల వాదన. అంతేకాకుండా టీఆర్ఎస్ ఎమ్మెల్సీగా ఉంటూ కాంగ్రెస్ పార్టీ నేతలు సిఫారుసు చేసిన అభివృద్ధి పనులకు భూపతిరెడ్డి నిధులు మంజూరు చేస్తున్నారని నేతలు బుధవారం జరిగిన సమావేశంలో మంత్రి, ఎంపీల దృష్టికి తీసుకొచ్చారు. వాస్తవానికి బాజిరెడ్డి మొదటి నుంచి టీఆర్ఎస్‌లోనే కొనసాగుతున్నారు. వైసీపీ నుంచి వచ్చి బాజిరెడ్డి గోవర్ధన్ రెడ్డి టీఆర్‌ఎస్‌లో చేరి 2014 ఎన్నికల్లో సీటు సంపాదించి ఎమ్మెల్యేగా గెలిచారు. అప్పటి నుంచి భూపతిరెడ్డి, బాజిరెడ్డి మధ్య వార్ నడుస్తోంది.

సస్పెండ్ చేస్తే కాంగ్రెస్ గూటికే..
బాజిరెడ్డిని ఇబ్బంది పెడుతున్న భూపతిరెడ్డిని పార్టీ నుంచి సస్పెండ్ చేయాలని బుధవారం జరిగిన సమావేశంలో నేతలంగా ఏకగ్రీవంగా తీర్మానించారు. ఈ మేరకు పార్టీ అధినేత కేసీఆర్‌కు సిఫారుసు చేసినట్లు సమాచారం. ఇటీవలే ఈ విషయంలో కేసీఆర్ కూడా భూపతిరెడ్డిని హెచ్చిరించారు. అయినప్పటికీ ఆయనలో ఎలాంటి మార్పు రాలేదు. కాబట్టి నేతల సిఫారుసు మేరకు భూపతిరెడ్డిని పార్టీ సస్పెండ్ చేయడం ఖాయంగా కనిపిస్తోంది. మరోవైపు భూపతిరెడ్డి ఇప్పటికే టీఆర్ఎస్‌ను వీడి కాంగ్రెస్‌లో చేరడానికి రంగం సిద్ధం చేసుకున్నట్లు సమాచారం. కాబట్టి టీఆర్ఎస్ నుంచి సస్పెండ్ చేసినా భూపతిరెడ్డి ఏ చింతా లేకుండా కాంగ్రెస్ గూటికి వెళ్తారట.