తెలంగాణ, దాని పరిసర ప్రాంతాల్లో ఏర్పడిన ఉపరితల ఆవర్తనం 2.1 కిలోమీటర్ల ఎత్తువరకు కొనసాగుతున్నది. ఉత్తర కోస్తాంధ్ర, పరిసర ప్రాంతాల్లో 3.1 కిలోమీటర్ నుంచి 3.6 కిలోమీటర్ల ఎత్తు మధ్య మరో ఉపరితల ఆవర్తనం ఏర్పడింది. ఈశాన్య బంగాళాఖాతం పరిసర ప్రాంతాల్లో ఈ నెల 20 అల్పపీడనం ఏర్పడే అవకాశం ఉన్నది. వీటి ప్రభావంతో రాష్ట్రంలో శుక్ర, శనివారాల్లో చాలాప్రాంతాల్లో ఉరుములు, మెరుపులతో కూడిన ఓ మోస్తరు నుంచి భారీ వర్షాలు కురిసే అవకాశం ఉన్నట్లు హైదరాబాద్ వాతావరణ కేంద్రం తెలిపింది. రాష్ట్రంలోని 19 జిల్లాలతోపాటు గ్రేటర్ హైదరాబాద్లో ఒకటి రెండు ప్రాంతాల్లో శుక్రవారం భారీ నుంచి అతి భారీ వర్షాలు కురిసే అవకాశం ఉందని పేర్కొంది.