ఎన్నికల నోటిఫికేషన్ విడుదల.. తెలంగాణలో నేటి నుంచే నామినేషన్లు

దేశంలో నాలుగో విడత ఎన్నికలకు నోటిఫికేషన్ విడుదలైంది. తెలంగాణ, ఏపీ సహా.. మరో 8 రాష్ట్రాల పార్లమెంట్ స్థానాలకు ఎన్నికలు జరగనున్నాయి. ఏపీ, బిహార్‌లో అసెంబ్లీ స్థానాలకు కూడా ఎన్నికలు జరగనున్నాయి. రాష్ట్రంలో 17 పార్లమెంట్ స్థానాలతో పాటు సికింద్రాబాద్ కంటోన్మెంట్ అసెంబ్లీ స్థానానికి ఉప ఎన్నిక జరగనుంది.

అసెంబ్లీ ఎన్నికల్లో అత్యధిక స్థానాలతో అధికారం సాధించిన కాంగ్రెస్‌ పార్టీ.. పార్లమెంట్ ఎన్నికలోనూ సత్తా చాటాలని భావిస్తోంది. రెండు సార్లు అధికారంలో కొనసాగి.. మూడోసారి అసెంబ్లీ ఎన్నికల్లో ఓడిపోయిన బీఆర్ఎస్ ఎంపీ ఎన్నికల్లో సత్తా చాటాలని భావిస్తోంది. అసెంబ్లీ ఎన్నికల్లో ఓట్ల శాతాన్ని పెంచుకున్న బీజేపీ. లోక్‌సభ పోరులో గతంలో కంటే ఎక్కువ స్థానాలు సాధించాలన్న లక్ష్యంతో బరిలో దిగుతోంది. బీఆర్ఎస్, బీజేపీలు అన్ని స్థానాలకూ అభ్యర్థులను ఇప్పటికే ప్రకటించగా.. కాంగ్రెస్‌ 14 సీట్లకు పేర్లు ఖరారు చేసింది. కరీంనగర్‌, ఖమ్మం, హైదరాబాద్‌లకు అభ్యర్థులను పెడింగ్‌లో ఉంచింది.

ఇక నోటిఫికేషన్ విడుదల కావటంతో నేటి నుంచే నామినేషన్ల ప్రక్రియ ప్రారంభమైంది. ఈనెల 25 వరకు నామినేషన్ల స్వీకరణ కొనసాగుతుంది. సెలవు దినాలు మినహా మిగిలిన రోజుల్లో ఉదయం 11 నుంచి మధ్యాహ్నం 3 గంటల వరకూ నామినేషన్ల స్వీకరణ ఉంటుంది. పార్లమెంట్ స్థానాలకు కలెక్టరేట్‌లలో, అసెంబ్లీ స్థానాలకు ఆయా నియోజకవర్గ ప్రధాన కేంద్రాల్లో నామినేషన్ల స్వీకరణ ఉంటుంది. లోక్‌సభకు పోటీ చేసి అభ్యర్థి రూ.25 వేలు, శాసనసభ అభ్యర్థి రూ.10 వేలు చొప్పున ధరావతు చెల్లించాలి. ఎస్సీ, ఎస్టీ అభ్యర్థులు ఇందులో 50 శాతం చెల్లిస్తే సరిపోతుంది.

నామినేషన్ వేసే అభ్యర్థితో పాటు మరో నలుగురికి మాత్రమే రిటర్నింగ్ అధికారి కార్యాలయం లోపలికి అనుమతి ఉంటుంది. నామినేషన్ వేసే అభ్యర్థుల ఊరేగింపుతో పాటు దాఖలు చేసే ప్రాంతంలో ఎన్నికల అధికారులు పూర్తిగా వీడియో రికార్డింగ్ చేస్తారు.

తెలంగాణ పార్లమెంట్ ఎన్నికలు 2024 ముఖ్యమైన తేదీలు

ఎన్నికల నోటిఫికేషన్ ఏప్రిల్ 18

నామినేషన్ల స్వీకరణ ఏప్రిల్ 18 నుంచి

నామినేషన్ల స్వీకరణకు తుదిగడువు ఏప్రిల్ 25

నామినేషన్ల పరిశీలన ఏప్రిల్ 26

నామినేషన్ల ఉపసంహరణ గడువు ఏప్రిల్ 29

పోలింగ్ తేదీ మే 13

ఎన్నికల ఫలితాలు జూన్ 04