సీఎం రిలీఫ్ ఫండ్‌కు తన కష్టార్జితం పంపించిన ర్యాపిడో డైవర్

తెలంగాణలో భారీ వర్షాలు ప్రజల జీవితాలను అతలాకుతలం చేశాయి. ముఖ్యంగా.. ఖమ్మం, మహబూబాబాద్, సూర్యాపేట, భద్రాద్రి కొత్తగూడెం జిల్లాల్లో పోటెత్తిన వరదలు.. నిరుపేదల బతుకుల్లో బురద నింపి.. వారిని రోడ్డు మీదికి లాగేశాయి. ఇలాంటి గడ్డు కాలంలో వరద బాధితులకు ప్రభుత్వంతో పాటు చాలా మంది అండగా నిలుస్తున్నారు. రాజకీయ, సినీ ప్రముఖులు భారీగా విరాళాలు ప్రకటిస్తూ.. మేమున్నామనే భరోసానిస్తున్నారు. ఈ క్రమంలోనే.. సామాన్యులు కూడా వరద బాధితులకు తోచినంత సాయం చేస్తూ.. ఆపద కాలంలో తోటివారికి సాయంగా నిలుస్తున్నారు. ఈ నేపథ్యంలోనే.. ఓ ర్యాపిడో డ్రైవర్ చేసిన సాయం ఇప్పుడు అందరినీ ఆలోచింపజేస్తోంది.

హైదరాబాద్‌లోని ఎల్బీనగర్‌కు చెందిన సాయి చంపాపేట్.. ఓ సోషల్ వర్కర్. అయితే.. తన ఖర్చుల కోసం ర్యాపిడో నడిపిస్తుంటాడు. అయితే.. రాష్ట్రంలో భారీ వర్షాల వల్ల తీవ్రంగా నష్టపోయిన వరద బాధితులకు తన వంతుగా సాయం చేయాలని సాయి.. తలచాడు. అలాగని.. సినిమా హీరోల్లా లక్షలో, కోట్లలో ఇచ్చే స్థోమత తనకు లేదు. అయినా.. తనకు తోచినంతా సాయం చేసి.. సాటి మనిషిగా మానవత్వం చాటుకోవాలన్నదే తన తపన. అందుకోసం.. తాను రోజూ చేసే పనినే.. వరద బాధితుల కోసం చేశాడు. ఒక రోజు మొత్తం ర్యాపిడో బైక్ రైడ్లు కొట్టిన సాయి.. ఆ వచ్చిన మొత్తాన్ని సీఎం రిలీఫ్ ఫండ్‌కు పంపించాడు. రోజు మొత్తం రైడ్లు కొట్టగా.. రూ.780 వచ్చాయి. వాటిని సీఎం రిలీఫ్ ఫండ్‌కు ట్రాన్స్‌ఫర్ చేసినట్టుగా.. స్వయంగా ట్విట్టర్ ఖాతా ద్వారా అందరికీ తెలియజేశారు.

"నా పేరు సాయి చంపాపేట్. నేను హైదరాబాద్‌లో ర్యాపిడో బైక్ నడుపుతాను. ఈరోజు ఉదయం నుంచి సాయంత్రం దాకా ర్యాపిడో బైక్ నడిపి 780 రూపాయలు సంపాదించడం జరిగింది. ఈరోజు నేను తెలంగాణ సీఎం రిలీఫ్ ఫండ్ అకౌంట్‌కి పంపడం జరిగింది. నా వంతు సాయంగా నేను చంపాపేట్ డివిజన్ ప్రజలందరి తరఫున." అంటూ సాయి తన ట్విట్టర్‌ ఖాతాలో పోస్ట్ పెట్టాడు. తన పోస్టును తెలంగాణ సీఎంవోతో పాటు కేటీఆర్‌కు కూడా ట్యాగ్ చేశాడు.

ఈ ర్యాపిడో డ్రైవర్ చేసిన సాయాన్ని ట్విట్టర్ ద్వారా పంచుకుని.. మరికొంత మందిలో చలనం కలిగించే ప్రయత్నం చేశాడు. కాగా.. సాయి చేసిన ఈ సాయంపై నెటిజన్ల నుంచి విశేష స్పందన వస్తోంది. బడాబాబులు చేసిన సాయం కంటే.. నువ్వు చేసిన సాయమే చాలా గొప్పది బ్రో.. నువ్వు సూపర్ బ్రో అంటూ నెటిజన్లు కామెంట్లు చేశారు. లక్షలు, కోట్లలో విరాళాలు ప్రకటిస్తే గొప్పవాళ్లు కాదు.. నీలా కష్టపడి నిస్వార్థంగా ఒక్క రూపాయి సాయం చేసినా గొప్పవాడేనని.. సాయిపై ప్రశంసలు కురిపిస్తున్నారు.