హైదరాబాద్‌లో కొత్త ఫ్లైఓవర్లు.. ట్రాఫిక్ రద్దీకి చెక్

హైదరాబాద్ మహా నగరం వేగంగా అభివృద్ధి చెందుతోంది. ఇప్పటికే నగరం అంతర్జాతీయ స్థాయిలో అభివృద్ది చెందింది. పలు అంతర్జాతీయ సంస్థలు నగరంలో పెట్టుబడులు పెట్టాయి. మరికొన్ని సంస్థలు పెట్టుబడులు పెట్టేందుకు ముందుకొస్తున్నారు. ఈ నేపథ్యంలో నగరాన్ని మరింతగా అభివృద్ధి చేసేందుకు ప్రభుత్వం చర్యలు తీసుకుంటుంది. నగర ప్రజలు ఎదుర్కొంటున్న ప్రధాన సమస్య ట్రాఫిక్. ప్రస్తుతం కొన్ని కొన్ని జంక్షన్లలో విపరీతమైన ట్రాఫిక్ రద్దీ ఉంటుంది. కి.మీ మేర వాహనాలు బారులు తీరుతాయి. దీంతో గత బీఆర్ఎస్ ప్రభుత్వం రహదారుల విస్తరణతో పాటు కొత్తగా ఫ్లైఓవర్లు నిర్మించి వాహనదారులకు అందుబాటులోకి తీసుకొచ్చారు.

 తాజాగా.. రేవంత్ ప్రభుత్వం కూడా నగరంలో కొత్త ఫ్లైఓవర్ నిర్మాణాలు, రోడ్డు విస్తరణపై స్పెషల్ ఫోకస్ పెట్టింది. నగరంలోని ప్రధాన ట్రాఫిక్‌ కారిడార్లలో రద్దీ తగ్గించేందుకు చర్యలు చేపట్టింది. రహదారి భద్రతకు రోడ్డు విస్తరణ, పైవంతెనల నిర్మాణాలపై దృష్టిసారించినట్లు జీహెచ్‌ఎంసీ కమిషనర్‌ ఆమ్రపాలి వెల్లడించారు. చార్మినార్‌ జోన్‌లో రోడ్డు ప్రాజెక్టులను బుధవారం (సెప్టెంబర్ 5) ఆమె తనిఖీ చేశారు. బెంగళూరు జాతీయ రహదారి నుంచి శాస్త్రీపురం జంక్షన్‌ వరకు 100 అడుగుల రహదారి విస్తరణ చేపట్టనున్నారు. శాస్త్రీపురం జంక్షన్‌ నుంచి ఇంజన్‌బౌలి వరకు 100 అడుగులతో రహదారి నిర్మించనున్నారు.

చాంద్రాయణగుట్ట క్రాస్‌ రోడ్‌ నుంచి పోలీస్‌ స్టేషన్‌ మీదుగా బార్కాస్‌ రహదారి వరకు 60 అడుగుల మేర రోడ్డు విస్తరణ చేపట్టనున్నారు. ఆజీం హోటల్‌ నుంచి చర్చి గేట్‌ వరకు 80 అడుగుల రోడ్డు విస్తరణ చేపడతారు. లక్కీ స్టార్‌ హోటల్‌ నుంచి హఫీజ్‌ బాబా నగర్‌ వరకు 60, 40 అడుగుల వెడల్పు రహదారి నిర్మించేందుకు ప్రణాళికలు రచించారు. బండ్లగూడ నుంచి ఎర్రకుంట వరకు రోడ్డు విస్తరణ, అభివృద్ధి పనులు చేపట్టేందుకు సిద్ధమయ్యారు. ఇక హఫీజ్‌ బాబా నగర్‌ జంక్షన్‌ వద్ద ఫ్లైఓవర్ నిర్మించేందుకి సిద్ధమయ్యారు. బండ్లగూడ జంక్షన్‌ వద్ద కొత్తగా ఫ్లైఓవర్, ఒవైసీ జంక్షన్‌ వద్ద ఎడమవైపు డౌన్‌ ర్యాంపు నిర్మాణం చేపట్టనున్నారు. ప్రస్తుతం ఈ పనులు ప్రతిపాదన దశలో ఉండగా.. త్వరలోనే ప్రభుత్వం నుంచి గ్రీన్ సిగ్నల్ రానుంది. ఆ తర్వాత రహదారుల విస్తరణ, కొత్త ఫ్లైఓవర్ల నిర్మాణం చేపట్టనున్నారు. ఇవి అందుబాటులోకి వస్తే ట్రాఫిక్ సమస్యలు తీరనున్నాయి.