కోట్ల ఆస్తిపై కన్ను.. ప్రియుడితో కలిసి భర్తను హత్య చేసిన భార్య, సినీ ఫక్కీలో డెడ్‌బాడీ మాయం

హైదరాబాద్ నగరానికి చెందిన ఓ వ్యాపారి దారుణ హత్యకు గురయ్యాడు. ఆస్తిపై కన్నేసిన భార్య ప్రియుడితో కలిసి దారుణంగా చంపేసింది. అనంతరం సినీఫక్కీలో డెడ్‌బాడీని మాయం చేసేందుకు ప్రయత్నించింది. కర్ణాటకకు తీసుకెళ్లి పెట్రోల్ పోసి తగులబెట్టింది. వివరాల్లోకి వెళితే.. హైదరాబాద్ నగరానికి చెందిన రమేష్, నిహారిక దంపతులు. గత కొన్నేళ్లుగా నగరంలోనే నివాసం ఉంటున్న రమేష్.. ఇక్కడే వ్యాపారం చేస్తున్నాడు. అయితే ఇటీవలే భార్య నిహారికకు మరో యువకుడితో పరిచయం ఏర్పడింది. ఆ పరిచయం కాస్త వివాహేతర బంధానికి దారి తీసింది. వారిద్దరూ కలిసి జీవిద్దామని నిర్ణయం తీసుకున్నారు.

రమేష్‌ను చంపేసి అతడికి ఉన్న రూ.8 కోట్ల విలువైన ఆస్తిని కాజేస్తే సుఖంగా ఉండొచ్చునని స్కెచ్ వేశారు. ఆస్తిని ఎలాగైనా కాజేయాలని భార్య నిహారిక ప్రియుడితో కలిసి భర్త హత్యకు ప్రణాళిక రూపొందించింది. భర్తకు మాయమాటలకు చెప్పిన భార్య నిహారిక వారం క్రితం భువనగిరి ప్రాంతానికి తీసుకెళ్లింది. ముందే ప్రియుడ్ని అక్కడ కాపలా ఉంచిన నిహారిక మాటల్లో పెట్టి రమేష్‌ను హత్య చేశారు. కారులోనే ఊపిరాడకుండా చేసి హత్య చేశారు. అనంతరం ఎవరికీ అనుమానం రాకుండా బీఎండబ్ల్యూ కారులో మృతదేహాన్ని కర్ణాటకకు తరలించారు.

అక్కడ ఓ కాఫీ ఎస్టేట్‌లో రమేష్ మృతదేహాన్ని మాయం చేసేందుకు నిర్ణయం తీసుకున్నారు. హర్యానాకు చెందినరాణా అనే వ్యక్తి సాయంతో రమేష్ మృతదేహాన్ని పెట్రోల్ పోసి నిప్పంటించారు. అనంతరం అక్కడ్నుంచి పరారయ్యారు. ఆ మరుసటి రోజు కాఫీ తోటలో పనికి వచ్చిన కూలీలు సగం కాలిన మృతదేహాన్ని గుర్తించారు. భయంతో వెంటనే స్థానిక పోలీసులకు ఫిర్యాదు చేశారు. అక్కడకు చేరుకున్న పోలీసులు మృతదేహాన్ని పరిశీలించారు. మృతదేహంపై ఉన్న ఆనవాళ్లు, సీసీ కెమెరాల ఆధారంగా విచారణ చేపట్టారు. సీసీ టీవీలో కనిపించిన కారు నెంబర్ ఆధారంగా హైదరాబాద్ వ్యక్తిగా గుర్తించారు. ఆ దిశగా విచారణ చేపట్టి నిహారిక, ఆమె ప్రియుడు, హత్యకు సహకరించిన రాణాను పోలీసులు అరెస్ట్ చేశారు. అయితే ఈ ఘటనకు సంబంధించి పూర్తి వివరాలు తెలియాల్సి ఉంది.