'హైడ్రా కమిషనర్ రంగనాథ్ ఇల్లు కూడా బఫర్ జోన్‌లోనే.. ఇదిగో ఆధారం

హైదరాబాద్ నగర పరిధిలోని.. చెరువులు, కుంటలు, ప్రభుత్వ భూముల్లోని అక్రమ నిర్మాణాల కూల్చివేతే లక్ష్యంగా హైడ్రా బుల్డోజర్లు విరుచుకుపడుతున్న విషయం తెలిసిందే. అయితే.. చెరువు ఎఫ్టీఎల్, బఫర్‌ జోన్లలో అక్రమంగా నిర్మించిన ఇండ్లను హైడ్రా నిర్ధాక్షిణ్యంగా కూల్చివేయటం సర్వత్రా విమర్శలకు తెరలేపిన విషయం తెలిసిందే. కనీసం తన నివాసాల్లోని సామాన్లు కూడా తీసుకోనివ్వకపోవటం.. కొద్దిరోజుల క్రితమే గృహప్రవేశం చేసిన ఇండ్లను కూల్చేయటం లాంటి ఘటనలు.. సామాన్యుల్లో తీవ్ర ఆగ్రహానికి కారణమయ్యాయి. అయితే.. హైడ్రా సంస్థకు కమిషనర్‌గా వ్యవహరిస్తున్న ఏపీ రంగనాథ్ ఇల్లు కూడా బఫర్‌ జోన్‌లోనే ఉందని.. అందుకు ఆధారాలు కూడా బయటపెట్టారు కాంగ్రెస్ బహిష్కృత నేత బక్కా జడ్సన్.

యూసుఫ్‌గూడలోని కృష్ణకాంత్‌ పార్క్‌ దగ్గరలోనే హైడ్రా కమిషనర్ ఏవీ రంగనాథ్‌ ఇల్లు ఉందని తెలిపిన బక్కా జడ్సన్.. అది చెరువు బఫర్‌ జోన్‌ పరిధిలోకే వస్తుందని వివరించారు. అయితే.. ప్రస్తుతం కృష్ణకాంత్‌ పార్కు ఉన్న ప్రాంతం ఒకప్పుడు పెద్ద చెరువు అని.. చంద్రబాబు హయాంలో చెరువును పూడ్చేసి పార్కు నిర్మించారని చెప్పుకొచ్చారు. ఎక్కడైనా చెరువు గట్టున మైసమ్మ ఆలయం ఉంటుందని.. కృష్ణకాంత్‌ పార్కుకు సమీపంలో కూడా కట్టమైసమ్మ గుడి ఉందని తెలిపారు. అక్కడ చెరువు ఉండేదని చెప్పేందుకు ఆ ఆలయమే అసలైన నిదర్శనమని చెప్పుకొచ్చారు.

అకి.. హెచ్‌ఎండీఏ మ్యాప్‌లో పెద్ద చెరువుకు సంబంధించిన ఎలాంటి ఆధారాలు కనిపించవని బక్కా జడ్సన్ తెలిపారు. కానీ.. వందేళ్ల క్రితం నాటి మ్యాప్‌లో పెద్ద చెరువు ఆనవాళ్లు ఉన్నట్టు బక్కా జడ్సన్‌ తెలిపారు. 2 నెలలు కష్టపడి వందేళ్ల నాటి మ్యాప్‌ సేకరించినట్టు తెలిపిన జడ్సన్.. వెంగళరావునగర్‌లో రంగనాథ్‌ నివసిస్తున్న ప్రస్తుత ఇల్లు.. పెద్ద చెరువు బఫర్‌ జోన్‌లోనే ఉందని.. వివరించారు. అందుకు ఆధారమే వందేళ్ల నాటి మ్యాప్ అని చెప్పుకొచ్చారు. చెరువు బఫర్‌ జోన్‌లో నిర్మించిన ఇంట్లో నివసించడంలేదని రంగనాథ్‌ నిరూపించుకోగలరా అంటూ జడ్సన్‌ సవాల్ విసిరారు.

రేవంత్ రెడ్డి ప్రభుత్వం 2013 భూసేకరణ చట్టాన్ని ఎందుకు అమలు చేయడం లేదని బక్కా జడ్సన్ ప్రశ్నించారు. ప్రజలకు ఓ న్యాయం, సీఎం రేవంత్ రెడ్డి అన్న తిరుపతి రెడ్డికి మరో న్యాయం ఉంటుందా అని నిలదీశారు. హైడ్రా కూల్చివేత బాధితులకు పరిహారం చెల్లించాలని జడ్సన్ డిమాండ్ చేశారు.

అయితే.. హైడ్రా కూల్చివేత విషయంలో మొదట్లో విపక్షాలు తీవ్ర స్థాయిలో విమర్శలు చేయగా.. ప్రస్తుతం అటు హైడ్రా దూకుడు తగ్గించగా, ఇటు ప్రతిపక్ష పార్టీల నేతలు కూడా ఆ విషయాన్ని కాస్త పక్కన పెట్టినట్టు కనిపిస్తోంది. కానీ.. కాంగ్రెస్ బహిష్కృత నేత బక్కా జడ్సన్ మాత్రం హైడ్రా కూల్చివేతల అంశాన్ని ఏమాత్రం వదలకుండా.. రేవంత్ రెడ్డి ప్రభుత్వాన్ని ఎప్పటికప్పుడు నిలదీస్తూనే ఉన్నారు.