ఉద్యోగం కోసం వెళితే లైంగికంగా వాడుకున్నాడు

పనికోసం తన సంస్థలో చేరిన ఓ అభాగ్యురాలిని యజమాని బెదరించి ఆమెతో లైంగిక వాంఛలను తీర్చుకున్నాడు. అంతేకాదు అతడితో ఏకాంతంగా గడిపిన సందర్భాల్లో వీడియోలను తీసి వాటిని సోషల్ మీడియాలో అప్ చేస్తానంటూ బెదిరింపులకు పాల్పడ్డాడు. దీంతో ఆ యువతి అనేకసార్లు ఆత్మహత్యయత్నం కూడా చేసింది. పోలీసులను ఆశ్రయించిన ప్రయోజనం లేకపోవడంతో చివరికి మీడియా ముందుకు వచ్చి తన గోడును వెళ్లబోసుకుంది. అతగాడి బండారాన్ని బాధితురాలు బయటపెట్టింది. తల్లిదండ్రులు చనిపోయిన ఓ 19 ఏళ్ల యువతి బతుకుదెరువు కోసం ఓ దుస్తుల పరిశ్రమలో చేరింది. అయితే ఆ సంస్థ యజమాని తనను భయపెట్టి శారీరకంగా లొంగదీసుకున్నాడని ఆమె ఆరోపించింది.

సోమాజిగూడలోని ప్రెస్‌క్లబ్‌లో బాధితురాలు ఆదివారం నాడు మాట్లాడుతూ.. ఏపీ ఆప్కో ఛైర్మన్‌ శ్రీనివాసరావు తండ్రి గుజ్జల రామకృష్ణ (65) కడపలో వస్త్ర పరిశ్రమలు నిర్వహిస్తున్నారు. ఆ పరిశ్రమలో నాలుగు నెలల కిందట పనిలో చేరిన తనను, రామకృష్ణ ఉద్యోగంలోంచి తీసేస్తానని బెదిరించి లొంగతీసుకున్నాడని ఆమె తెలిపింది. తర్వాత తనతో ఏకాంతంగా గడిపిన సందర్భాల్లో వీడియోలు తీసి వాటిని సోషల్ మీడియాలో పెడతానని బెదిరించి తనను ఇతరుల వద్దకు పంపేవాడని తెలియజేసింది. అతడి వేధింపులకు తట్టుకోలేక పలుసార్లు ఆత్మహత్యాయత్నం కూడా చేశానని, గత డిసెంబరులో కడప పోలీసులకు కూడా ఫిర్యాదు చేశానని పేర్కొంది.

అయితే ఒన్‌టౌన్ ఏఎస్‌ఐ తనతో ఓ తెల్లకాగితంపై సంతకం చేయించుకుని, రూ.50వేలు ఇస్తాడు.. విషయాన్ని ఇక్కడితో వదిలేయమని దబాయించాడని వాపోయింది. నిందితుడు రామకృష్ణ తనలాగే చాలా మంది మహిళలను లొంగదీసుకున్నాడని, భవిష్యత్తులో మరే అమ్మాయికీ ఇలా జరగొద్దని వేడుకుంది. రాష్ట్రంలో మా ప్రభుత్వం ఉంది, దిక్కున్న చోట చెప్పుకో అంటూ నిర్లక్ష్యంగా మాట్లాడుతున్నరామకృష్ణకు శిక్ష పడేలా ప్రభుత్వం చర్యలు తీసుకోవాలని బాధితురాలు కోరారు. రామకృష్ణ వ్యవహారానికి సంబంధించిన వీడియోలను సైతం ఆమె మీడియాకు అందజేశారు.