రోహిత్ శర్మ ‘డక్’ చెత్త రికార్డు పదిలం
Telangana Telugu | Suryaa Desk | Published : Wed, Mar 07, 2018, 09:58 AM
భారత జట్టు తాత్కాలిక కెప్టెన్ రోహిత్ శర్మ టీ20ల్లో అరుదైన చెత్త రికార్డుని మరింత పదిలం చేసుకున్నాడు. ఇప్పటికే టీ20 క్రికెట్ చరిత్రలో భారత్ తరఫున అత్యధిక సార్లు డకౌటైన క్రికెటర్‌గా రికార్డుల్లో అగ్రస్థానంలో ఉన్న రోహిత్ శర్మ.. మంగళవారం రాత్రి ముక్కోణపు టీ20 సిరీస్‌లో భాగంగా శ్రీలంకతో ముగిసిన తొలి టీ20లోనూ డకౌటయ్యాడు. ఇన్నింగ్స్ తొలి ఓవర్‌లోనే చమీరా బౌలింగ్‌లో రోహిత్ శర్మ (0: 4 బంతుల్లో) ఫీల్డర్ తలమీదుగా బంతిని బౌండరీకి తరలించబోయి మెండిస్‌కి దొరికిపోయాడు. ఈ మ్యాచ్‌లో భారత్‌పై శ్రీలంక 5 వికెట్ల తేడాతో గెలుపొందింది.
భారత్ తరఫున ఇప్పటి వరకు 75 టీ20 మ్యాచ్‌లాడిన రోహిత్ శర్మ ఏకంగా ఐదుసార్లు డకౌట్‌గా వెనుదిరిగాడు. అతని తర్వాత స్థానంలో ఆశిష్ నెహ్రా మూడు సార్లు, యూసఫ్ పఠాన్ మూడు సార్లు, గౌతమ్ గంభీర్, రవీంద్ర జడేజా రెండేసి సార్లు పరుగులేమీ చేయకుండానే టీ20ల్లో ఔటయ్యారు. శ్రీలంక గడ్డపై కూడా రోహిత్ శర్మకి పేలవమైన రికార్డు కొనసాగుతోంది. ఇప్పటి వరకు అక్కడ 9 మ్యాచ్‌లాడిన రోహిత్.. చేసిన పరుగులు 95 మాత్రమే. ఇందులో ఒకే ఒక అర్ధశతకం ఉంది. ముక్కోణపు టీ20 సిరీస్‌లో భాగంగా రెండో టీ20 మ్యాచ్ గురువారం భారత్, బంగ్లాదేశ్ మధ్య కొలంబో వేదికగా జరగనుంది.
|
|
