జైలులో శశికళకు వివిఐపి సౌకర్యాలా...: మాజీ డిజిపి
Telangana Telugu | Suryaa Desk | Published : Thu, Mar 08, 2018, 10:41 AM
బెంగళూరు: అక్రమాస్తుల కేసులో జైలు శిక్ష అనుభవిస్తున్న అన్నాడిఎంకె నేత శశికళకు జైలులో వివిఐపి ట్రీట్‌మెంట్‌ ఇవ్వాలని కర్నాటక ముఖ్యమంత్రి సిద్ధరామయ్య ఆదేశాలు జారీ చేసినట్లు మాజీ డిజిపి హెచ్‌ఎన్‌ఆర్‌ రావు ఆరోపించారు. జైల్లో ఉన్న శశికళకు మంచం, బెడ్‌, తలగడ తదితర సౌకర్యాలు సమకూర్చాలని సిఎం ఆదేశించారని పేర్కొన్నారు. అయితే ముఖ్యమంత్రి సిద్ధరామయ్య మాజీ డిజిపి వ్యాఖ్యల్ని ఖండించారు. శశికళకు సౌకర్యాలు సమకూర్చాలని తానెప్పుడూ అధికారులను ఆదేశించలేదని తేల్చి చెప్పారు. ఆమెను పరామర్శించిన ఓ ప్రతినిధి బృందం ఆమెకు కనీస సౌకర్యాలు కూడా అందించడం లేదని ఫిర్యాదు చేసిందని, దీంతో జైలు నిబంధనల ప్రకారం కనీస సౌకర్యాలను మాత్రమే కల్పించాలని తాను ఆదేశించినట్టు చెప్పారు. జైళ్ల శాఖపై వస్తున్న ఆరోపణలపై విచారణకు తాను ఆదేశించినందునే మాజీ డిజిపి తనపై ఈ విధంగా ఆరోపణలు చేశారని సిఎం పేర్కొన్నారు. హోంమంత్రి రామలింగారెడ్డి మాట్లాడుతూ వైద్యుల ఆదేశాల మేరకు శశికళకు ఆ సౌకర్యాలు కల్పించినట్టు వెల్లడించారు.
|
|
