ఢిల్లీ డేర్‌డెవిల్స్‌లో సగం అమ్మేశారు
Telangana Telugu | Suryaa Desk | Published : Sat, Mar 10, 2018, 10:41 AM
ఇండియన్ ప్రీమియర్ లీగ్(ఐపీఎల్)లో జీఎంఆర్ గ్రూప్‌నకు చెందిన ఢిల్లీ డేర్‌డెవిల్స్ ఫ్రాంఛైజీలో 50శాతం వాటాను జేఎస్‌డబ్య్లూ స్పోర్ట్స్ కొనుగోలు చేసింది. ఈ విషయాన్ని రెండు సంస్థలు సంయుక్తంగా వెల్లడించాయి. ఐతే ఈ కొనుగోలు ఒప్పందానికి బీసీసీఐ ఆమోద ముద్ర వేయాల్సి ఉంది. మార్చి 16న జరిగే ఐపీఎల్ గవర్నింగ్ కౌన్సిల్ ముందు ఈ ఒప్పందంపై చర్చించనున్నారు. ఐపీఎల్ ప్రారంభం నుంచి ఒక ఫ్రాంఛైజీలో వాటాను అమ్మడం ఇదే ప్రథమం. లీగ్‌లో ఇప్పటి వరకు పది సీజన్లు ముగిసినప్పటికీ ఒక్కసారి కూడా ఢిల్లీ టైటిల్ నెగ్గలేదు. అధికారికంగా ఒప్పందానికి సంబంధించిన ఆర్థిక వ్యవహారాలు ఇరు కంపెనీలు వెల్లడించలేదు.
జీఎంఆర్ ప్రమోటర్లు జీఎంఆర్ స్పోర్ట్స్‌ను ఏర్పాటు చేశారు. 2008లో ఢిల్లీ ఫ్రాంఛైజీని 84 మిలియన్ అమెరికా డాలర్లకు జీఎంఆర్ గ్రూప్ కొనుగోలు చేసింది. మరోవైపు జేఎస్‌డబ్య్లూ స్పోర్ట్స్ సంస్థ కూడా పలు క్రీడల్లో ఫ్రాంఛైజీలను దక్కించుకుంది. ఇప్పటికే ఫుట్‌బాల్‌లో బెంగళూరు ఎఫ్‌సీ, ప్రొ రెజ్లింగ్‌లో బెంగళూరు యోధాస్, ప్రొ కబడ్డీ లీగ్‌లో హరియాణా స్టీలర్స్‌ను కలిగి ఉన్న జేఎస్‌డబ్య్లూ తాజాగా ఐపీఎల్‌లోకి అడుగుపెట్టింది.
|
|
