అన్నదాతలకు మద్దతుగా ముంబయి వాసులు

కాలినడకన దాదాపు 180కిలోమీటర్లు ప్రయాణించి ముంబయికి చేరుకున్న అన్నదాతలకు ముంబయి వాసులు నైతికంగా అండగా నిలిచారు. పూర్తి రుణమాఫీతో పాటు మరికొన్ని డిమాండ్లతో మహారాష్ట్రలో దాదాపు 50వేల మంది రైతులు నాసిక్‌ నుంచి బయలుదేరి కాలినడకన నిన్న ముంబయికి చేరుకున్న సంగతి తెలిసిందే. మండుటెండలో నడుస్తూ మధ్యా్‌హ్నం 2.30 సమయంలో ముంబయికి చేరుకున్న రైతులకు ముంబయి వాసులు ఆత్మీయ స్వాగతం పలికారు. వారు అక్కడికి చేరుకోగానే మంచినీటి ప్యాకెట్లు, తినుబండారాలు అందజేశారు. కొన్ని  స్వచ్ఛంద సంస్థల ఆధ్వర్యంలో రైతుల కోసం ఆహార పదార్థాలను ఏర్పాటు చేశారు. నగరంలోని కొన్ని జంక్షన్ల వద్ద వారికి బిస్కెట్‌ ప్యాకెట్లు పంచారు. దాదాపు పదివేల మంచినీటి బాటిళ్లు పంచామని ఓ స్వచ్ఛంద సంస్థ నిర్వహకులు తెలిపారు. కొన్ని కుటుంబాలు మొత్తం యాత్రలో పాల్గొన్నాయి. మహిళలు, చిన్నారులు కూడా ఉన్నారు. వారి డిమాండ్లు నెరవేరాలని కోరుకుంటున్నామని, మాకు చేతనైన సాయం చేశామని చెప్తున్నారు. రాజకీయ పార్టీలకు చెందిన కార్యకర్తలు కూడా వారికి కూడళ్ల వద్ద నీళ్లు, స్నాక్స్‌ పంచారు.

వామపక్ష అనుబంధ సంఘమైన అఖిల భారత కిసాన్‌ సభ ఆధ్వర్యంలో రైతులు ఆరు రోజుల పాటు నాసిక్‌ నుంచి 180కిలోమీటర్లు ర్యాలీచేశారు. వీరి చేతుల్లోని జెండాలతో ముంబయి రోడ్లు అంతా ఎరుపు రంగు సంతరించుకున్నాయి. సోమవారం ఉదయం ర్యాలీగా విధానసభకు వెళ్తే ముంబయిలో ట్రాఫిక్‌కు, పదో తరగతి పరీక్ష రాసే విద్యార్థులకు ఇబ్బంది కలుగుతుందని అధికారులు చెప్పడంతో వారు ఎవ్వరికీ ఇబ్బంది కలిగించకుండా ఉండేందుకు ఆదివారం అర్థరాత్రే ర్యాలీగా ఆజాద్‌ మైదానానికి వెళ్లారు. వారి కోసం మొబైల్‌ టాయిలెట్లు, నీటి ట్యాంకర్లు, అంబులెన్సులు ఏర్పాటు చేశారు. ముంబయి మహానగర వాసులకు ఎలాంటి ఇబ్బందులు కలిగించమని, సోమవారం ఉదయం పదో తరగతి పరీక్ష రాసే విద్యార్థులకు కూడా మా వల్ల ఎలాంటి ఇబ్బంది రాదని స్పష్టం చేశారు. రాష్ట్ర మంత్రి గిరీష్‌ మహాజన్‌ రైతు నేతలతో చర్చించి ముఖ్యమంత్రితో సమావేశానికి ఆహ్వానించారు. యాత్రకు నేతృత్వం వహించిన 12 మంది సభ్యులు ముఖ్యమంత్రి దేవేంద్ర ఫడణవీస్‌ను కలిసి చర్చించనున్నారు.