పట్టాలెక్కనున్న తొలి స్వదేశీ ట్రైన్
Telangana Telugu | Suryaa Desk | Published : Fri, Mar 16, 2018, 01:39 PM
న్యూఢిల్లీ: స్వదేశీ సాంకేతికతో రూపొందించిన ప్రయాణికుల రైలు త్వరలో పట్టాలెక్కనుంది. గంటకు 160కి.మీ వేగంతో దూసుకెళ్లనున్న సెమీ హైస్పీడ్ రైలు వచ్చే జూన్‌లో పరుగులు తీయనుంది. లోకోమోటివ్‌లకు భిన్నంగా మెట్రో రైళ్ల మాదిరిగా నడిచేలా దీన్ని అభివృద్ధి చేశారు. అధిక వేగంతో పాటు స్వల్పవ్యవధిలోనే అత్యధిక వేగాన్ని అందుకొని ప్రయాణ సమయాన్ని తగ్గించనుంది. ప్రీమియం విభాగంలో ఉన్న శతాబ్ధి ఎక్స్‌ప్రెస్ రైళ్ల స్థానంలో వీటిని ప్రవేశపెట్టనున్నారు. 16 కోచ్‌ల ట్రైన్‌లో ఛైర్-కార్ సీటింగ్‌తో పాటు అత్యాధునిక సౌకర్యాలను ఏర్పాటు చేశారు. దీని విలువ సుమారు రూ.100కోట్లు. ఒక్కో కోచ్‌ను నిర్మించేందుకు దాదాపు రూ.6కోట్ల ఖర్చు చేశారు. యూరోపియన్ కోచ్‌ల తరహానే డిజైన్ చేసినప్పటికీ వాటితో పోలిస్తే వీటి ఖర్చు 40శాతం తక్కువ కావడం విశేషం. భారత రైల్వే ఆధ్వర్యంలోని చెన్నై ఇంటిగ్రెల్ కోచ్ ఫ్యాక్టరీలో ఈ నూతన ట్రైన్‌ను తయారు చేస్తున్నారు. ఇండియన్ రైల్వే సొంతంగా సెమీహైస్పీడ్ ట్రైన్‌ను తయారు చేయడం ఇదే తొలిసారి.గంటకు 160కి.మీ వేగంతో ప్రయాణించనున్న ట్రైన్ దేశంలోనే అత్యంత వేగవంతమైన రైలుగా గుర్తింపు పొందనుంది. కొత్త ట్రైన్ విజయవంతమైతే నెమ్మదిగా శతాబ్ధి రైళ్ల స్థానంలో వీటిని భర్తీ చేయనున్నట్లు కోచ్ ఫ్యాక్టరీ జనరల్ మేనేజర్ సుధాన్షు మణి తెలిపారు.
|
|
