గౌడ కులస్థులకు కేసీఆర్ వరాలు.. చెట్ల రకం రద్దు
Telangana Telugu | Suryaa Desk | Published : Thu, Mar 22, 2018, 12:58 PM
హైదరాబాద్: సీఎం కేసీఆర్ గౌడ కులస్థులకు అసెంబ్లీ సాక్షిగా వరాల జల్లు ప్రకటించారు. అసెంబ్లీ సమావేశాల్లో భాగంగా కులవృత్తిపై శాసనసభలో సీఎం మాట్లాడుతూ.. ఇప్పటి నుంచి తాటి, ఈత చెట్లపై పన్నును పూర్తిగా రద్దు చేస్తున్నట్లు ప్రకటించారు. గౌడ భవనం నిర్మాణం కోసం 5 ఎకరాల భూమి, రూ. 5 కోట్లు మంజూరు చేస్తున్నట్లు తెలిపారు. కుల వృత్తిని నమ్ముకున్న వారిలో గౌడ కులస్థులు ముఖ్యులన్నారు. సమైక్య పాలకుల పాపంతో కల్లుగీత వృత్తి కల్లోలంలో పడిందన్నారు. లిక్కర్ మాఫియా ముసుగులో కల్లు దుకాణాలను ఎత్తేశారు. ఉద్యమ సమయంలో గౌడ్ కులస్థులకు జరుగుతున్న అన్యాయాన్ని పదే పదే ప్రశ్నించామన్నారు. ఇచ్చిన మాట ప్రకారం హైదరాబాద్లో కల్లు దుకాణాలు తెరిపించాం. ప్రమాదవశాత్తు మరణించిన లేదా శాశ్వత అంగవైకల్యం చెందినా పరిహారాన్ని రూ. 5 లక్షలకు పెంచినట్లు చెప్పారు. గీత కార్మికుల పెన్షన్ను రూ. 200 నుంచి రూ. 1000 పెంచినమన్నారు. టీఎఫ్టీ కార్మికులకు కూడా ఫించన్ ఇస్తామన్నారు. దీంతో 30 వేల కుటుంబాలకు లబ్ధి చేకూరనున్నట్లు సీఎం తెలిపారు. అదేవిధంగా లైసెన్స్ రెన్యూవల్ గడువును ఐదేళ్ల నుంచి పదేళ్లకు పెంచుతున్నట్లు చెప్పారు. గడిచిన మూడేళ్లలో రూ. 6.38 కోట్ల పరిహార బకాయిలు చెల్లించినట్లు వెల్లడించారు. హరితహారంలో భాగంగా చెరువు గట్లు, వాగులు. వర్రెలు, నదీ ప్రవాహానికి ఇరు వైపుల కోటి 70 లక్షల తాటి, ఈత మొక్కలు నాటినట్లు సీఎం పేర్కొన్నారు.
|
|
