మినిమమ్ బ్యాలెన్స్ గీకితే మోతే
Telangana Telugu | Suryaa Desk | Published : Thu, Mar 22, 2018, 02:37 PM
అకౌంట్లోని మినిమమ్ బ్యాలెన్స్ను వాడేస్తున్నారా..? ఏటీఎంలో గీకేస్తున్నారా..? షాపులో ఏదైనా కొనేసి ఆ మినిమమ్ బ్యాలెన్స్ నుంచే కట్టేస్తున్నారా..? ఒకవేళ అలా చేస్తే... మీపై బాదుడే సుమా!! అవును ఖాతాల్లోని కనీస నిల్వ నుంచి డబ్బులు తీసినా.. షాపులో ఏదైనా కొనుగోలు చేసి పీవోఎస్లో వాడినా చార్జీల మోత మోగుతుంది. అందుకు ఎస్బీఐ అయితే రూ.17, హెచ్డీఎఫ్సీ, ఐసీఐసీఐ లాంటి ప్రైవేటు బ్యాంకులైతే రూ.25 చార్జీలను వసూలు చేస్తున్నాయి. వాటికి మళ్లీ జీఎస్టీ అదనం. అయితే, డెబిట్ కార్డుల వాడకాన్ని ప్రోత్సహించాలని కేంద్రం నిర్ణయం తీసుకున్నా.. బ్యాంకులు మాత్రం ఇలా చార్జీలు వసూలు చేయడం దారుణమని పలువురు అసహనం వ్యక్తం చేస్తున్నారు. ప్రస్తుతం బ్యాంకులు డిజిటల్ వ్యతిరేక పోకడకు వెళ్తున్నాయని ఐఐటీ బాంబే గణిత శాస్త్ర ప్రొఫెసర్ ఆశిష్ దాస్ అంటున్నారు. నెలవారీ వేతనంపై జీవించే సామాన్యుల నుంచి అనవసరంగా చార్జీలు వసూలు చేస్తూ భారం వేస్తున్నారని ఆయన అన్నారు. ఇక, ఏటీఎంలలో కనీస నిల్వ నుంచి చేసే లావాదేవీలను తిరస్కరించి చార్జీలను విధించడం దారుణమన్నారు. లావాదేవీ తిరస్కరించాక మళ్లీ దానిపై బాదుడెందుకు అని ప్రశ్నిస్తున్నారు.
|
|
