గుడుంబా విక్రేతలకు పునరావాసం కల్పిస్తున్నాము : పద్మారావు
Telangana Telugu | Suryaa Desk | Published : Fri, Mar 23, 2018, 11:19 AM
హైదరాబాద్ : రాష్ట్రంలో గుడుంబా తయారీని పూర్తి స్థాయిలో రూపుమాపామని ఎక్సైజ్ శాఖ మంత్రి పద్మారావు స్పష్టం చేశారు. శాసనసభలో ప్రశ్నోత్తరాల సందర్భంగా గుడుంబా అంశంపై సభ్యులు అడిగిన ప్రశ్నలకు మంత్రి సమాధానం ఇచ్చారు. గ్రామాల్లో తాటి, ఈత చెట్ల పెంపకాన్ని ప్రోత్సహిస్తున్నామని తెలిపారు. గుడుంబా విక్రేతలకు పునరావాసం, ప్రత్యామ్నాయ జీవనోపాధి కల్పిస్తున్నామని చెప్పారు. ప్రత్యామ్నాయ జీవనోపాధి కింద రూ. 2 లక్షల వరకు మంజూరు చేయడం జరుగుతుందన్నారు. ఈ డబ్బును సబ్సిడీ కింద మంజూరు చేస్తున్నామని చెప్పారు. ఈ పథకంలో వితంతువులు, ఒంటరి మహిళలు, వికలాంగులకు మొదటి ప్రాధాన్యత ఇవ్వడం జరుగుతుంది. ఇప్పటికే కొన్ని వేల మందికి పునరావాసం కల్పించినట్లు మంత్రి చెప్పారు. నల్లబెల్లం తయారీ, అమ్మకాలపై నిఘా పెడుతున్నామని తెలిపారు. హరితహారం కింద ఈత, తాటి, కర్జూర మొక్కలను నాటుతున్నామని వెల్లడించారు. ఇప్పటి వరకు కోటి 70 లక్షల మొక్కలు నాటాం. చెరువులు, వాగులు, కాలువల పక్కల ఈత మొక్కలు నాటడం జరుగుతుందన్నారు. ధూల్పేటలో ఉన్న 5 ఎకరాల స్థలంలో అక్కడి ప్రజలకు ఉపయోగపడే విధంగా ఓ పరిశ్రమను నెలకొల్పుతామన్నారు. దీనిపై సీఎంతో చర్చించి నిర్ణయం తీసుకుంటామని తెలిపారు. మొత్తానికి గుడుంబా విక్రయదారులకు ప్రత్యామ్నాయ జీవనోపాధి కల్పించేందుకు ప్రభుత్వం చర్యలు తీసుకుంటుందని పద్మారావు స్పష్టం చేశారు.
|
|
