రాష్ట్రంలో చేనేత కార్మికులకు తీపికబురు

చేనేతలకు రాష్ట్ర ప్రభుత్వం మరింత ఊరట కల్పించింది. తెలంగాణ రాష్ట్రం ఏర్పడటానికి పూర్వం నుంచి చేనేత కార్మికులకు ఉన్న రుణాలను కూడా మాఫీ చేయాలని ప్రభుత్వం నిర్ణయించింది.  2010 ఏప్రిల్ 1 నుంచే రుణమాఫీని వర్తింపజేస్తూ ఉత్తర్వులు జారీ చేసింది. ప్రభుత్వం నిర్ణయం వల్ల దాదాపు 8,500 మంది చేనేత కార్మికులు రుణ విముక్తులవుతారని, రూ.40 కోట్ల వరకు లబ్ధిపొందుతారని ఐటీ, పరిశ్రమలశాఖల మంత్రి కేటీఆర్‌ పేర్కొన్నారు.

ప్రభుత్వం తొలుత చేనేత కార్మికులు జాతీయ బ్యాంకుల నుంచి, జిల్లా  కేంద్ర సహకార బ్యాంకుల నుంచి చేనేత ఉత్పత్తుల కోసం తీసుకున్న రుణాల్లో 2014 జనవరి 1 నుంచి 2017 మార్చి 31 వరకు తీసుకున్న వర్కింగ్ కాపిటల్, వ్యక్తిగత రుణాలను రూ.లక్ష వరకు మాఫీ చేస్తూ జీవోను జారీ చేసింది.  గత ప్రభుత్వం 2010 మార్చి 31 వరకు మాత్రమే రుణమాఫీ చేసింది. ఆ తర్వాత సంవత్సరాల్లో ఎలాంటి రుణమాఫీ కాలేదు. ఈవిషయాన్ని పలువురు నేతలు తమ దృష్టికి తీసుకొచ్చారని, ప్రస్తుత రుణమాఫీని 2010 ఏప్రిల్ ఒకటి నుంచి వర్తింపజేయాలని కోరడంతోనే రుణమాఫీ చేశామని మంత్రి కేటీఆర్‌ స్పష్టం చేశారు. ప్రభుత్వ పథకాలకు 2014 జూన్ 2ను కటాఫ్ డేట్‌గా పరిగణించి నిర్ణయాలు తీసుకుంటున్నామని చేనేత రుణమాఫీ విషయంలో నేతన్న సంక్షేమం కోసం ప్రత్యేక అంశంగా పరిగణించి సీఎం కేసీఆర్ ఆదేశాల మేరకు ఈ నిర్ణయం తీసుకున్నట్టు పేర్కొన్నారు. రుణమాఫీ ద్వారా చేనేత కార్మికులకు సాధ్యమైనంత గరిష్ఠంగా ప్రయోజనం కలిగించాలని లక్ష్యంగా పెట్టుకున్నామని చెప్పారు. సాధారణంగా రుణమాఫీ చేసిన సందర్భాల్లో రుణాలు చెల్లించని వారికే రుణమాఫీ వర్తింపజేస్తారని.. కానీ, సకాలంలో రుణాలు చెల్లించినవారు నష్టపోకుండా ఉండేందుకు.. వారు చెల్లించిన రుణాలను సైతం ప్రభుత్వం తిరిగి వారి ఖాతాల్లో జమ చేస్తుందని మంత్రి తెలిపారు. రుణాలు చెల్లించిన కార్మికుల ఖాతాల్లో లక్ష రూపాయల పరిమితితో వారి డబ్బులను తిరిగి చెల్లిస్తున్నామన్నారు.

చేనేత రుణమాఫీని 2014 నుంచి కాకుండా  2010 నుంచి అమలు చేయడం అద్భుత నిర్ణయమని వీవర్స్  డెవలప్‌మెంట్ ఫౌండేషన్ అధ్యక్షుడు సురేశ్‌దాస్ అన్నారు.  దీని వల్ల 8,500 మంది లబ్ధి పొందుతారని, చేనేత కార్మికులు ప్రభుత్వానికి రుణపడి ఉంటారని చెప్పారు. పాత రుణాల గురించి తాము కూడా  ప్రభుత్వానికి తెలియజేశామని, కార్మికుల కష్టాలను గుర్తించిన ప్రభుత్వం అనుకూల నిర్ణయం తీసుకున్నదని పేర్కొన్నారు.