కివీస్తో టెస్ట్.. పోరాడి ఓడిన ఇంగ్లాండ్
Telangana Telugu | Suryaa Desk | Published : Mon, Mar 26, 2018, 03:27 PM
ఆక్లాండ్లోని ఈడెన్ పార్క్ వేదికగా ఇంగ్లాండ్తో జరిగిన తొలి టెస్టులో న్యూజిలాండ్ జట్టు ఇన్నింగ్స్ 49 పరుగుల తేడాతో గెలుపొందింది. ఇరు జట్ల మధ్య ఇప్పటి వరకూ 50 టెస్టులు జరిగితే ఇది కివీస్కు పదో విజయం మాత్రమే. తొలి ఇన్నింగ్స్లో 58 పరుగులకే కుప్పకూలిన ఇంగ్లాండ్ చివరి ఇన్నింగ్స్లో మాత్రం అద్భుతంగా పోరాడింది. చివరి గంట వరకూ మ్యాచ్ను డ్రాగా ముగించేందుకు ప్రయత్నించింది.
మొదటి ఇన్నింగ్స్లో కేవలం 93 నిమిషాల్లో.. 20.4 ఓవర్లలోనే ఇంగ్లాండ్ బ్యాటింగ్ ఆర్డర్ కుప్పకూలింది. తర్వాత బ్యాటింగ్ చేసిన న్యూజిలాండ్ జట్టు 427-8 వద్ద తొలి ఇన్నింగ్స్ను డిక్లేర్ చేసింది. వర్షం కారణంగా రెండు రోజులు ఆటకు అంతరాయం కలిగింది. దీంతో 132-3 వద్ద ఐదో రోజు ఆట ప్రారంభించిన ఇంగ్లిష్ జట్టు ఆఖరి రోజు అద్భుతంగా పోరాడింది.
బెన్ స్టోక్స్ (188 బంతుల్లో 66), క్రిస్ వోక్స్ (118 బంతుల్లో 52) రాణించడంతో ఇంగ్లాండ్ మ్యాచ్ను డ్రాగా ముగించేందుకు శతథా ప్రయత్నించింది. నైల్ వాగ్నర్ షార్ట్ పిచ్ బంతులతో కవ్వించినా.. స్టోక్స్ దీటుగా ఎదుర్కొన్నాడు. కానీ లంచ్ విరామానికి ముందు అతణ్ని వాగ్నర్ అవుట్ చేశాడు. టెయిలెండర్లు త్వరగా అవుటవడంతో ఇంగ్లాండ్ జట్టు చివరి సెషన్లో ఓటమిపాలైంది. ఆ జట్టు రెండో ఇన్నింగ్స్లో ఏకంగా 126.1 ఓవర్లపాటు పోరాడింది. రెండు ఇన్నింగ్స్ల్లో కలిపి 10 వికెట్లు తీసిన ట్రెంట్ బౌల్ట్కి మ్యాన్ ఆఫ్ ది మ్యాచ్ దక్కింది. ఓడినా ఇంగ్లాండ్ తన పోరాటంతో ఆకట్టుకుంది.
|
|
