జీశాట్-6ఏ ప్రయోగానికి సిద్ధం
Telangana Telugu | Suryaa Desk | Published : Wed, Mar 28, 2018, 09:59 AM
భారత అంతరిక్ష పరిశోధనా సంస్థ (ఇస్రో) మరో ప్రతిష్ఠాత్మక ప్రయోగానికి సిద్ధమైంది. శ్రీహరికోటలోని సతీష్ ధావన్ స్పేస్ సెంటర్ షార్ నుంచి గురువారం సాయంత్రం 4.56 గంటలకు జీఎస్ఎల్వీ-ఎఫ్08 రాకెట్ ద్వారా జీశాట్-6ఏ ఉపగ్రహాన్ని నింగిలోకి పంపనుంది. బెంగళూరులోని ఉపగ్రహ తయారీ కేంద్రం నుంచి జీశాట్-6ఏను రోడ్డు మార్గం ద్వారా అత్యంత భారీ భద్రత నడుమ ప్రత్యేక వాహంలో శ్రీహరికోటకు తరలించారు. 2,140 కిలోల బరువున్న జీశాట్-6ఏ ఉపగ్రహం సమాచార రంగానికి చెందింది. దేశంలో కమ్యూనికేషన్ వ్యవస్థను మరింత బలోపేతం చేసేందుకు ఇస్రో ఈ ఉపగ్రహాన్ని ప్రయోగిస్తోంది. ఈ ప్రయోగం విజయవంతమైతే పదేళ్ల పాటు సేవలు అందించనుంది. ఉపగ్రహ ప్రయోగానికి సంబంధించి 27 గంటల కౌంట్డౌన్ బుధవారం మధ్యాహ్నం 1.56 నిమిషాలకు ప్రారంభమవుతుందని ఇస్రోకు చెందిన మిషన్ రెడీనెస్ రివ్యూ కమిటీ మంగళవారం వెల్లడించింది.
సుమారు 415.6 టన్నుల బరువు, 49.1 మీటర్ల పొడవున్న జీఎస్ఎల్వీ రాకెట్ను గురువారం సాయంత్రం సరిగ్గా 4.56 నిమిషాలకు షార్ కేంద్రంలోని రెండో లాంచింగ్ ప్యాడ్ నుంచి ప్రయోగిస్తారు. ప్రయోగించిన 17 నిమిషాల్లోని ఉపగ్రహాన్ని రాకెట్ నిర్ణీత కక్ష్యలో ఉంచనుందని శాస్త్రవేత్తలు పేర్కొన్నారు. ప్రస్తుతం ప్రయోగించే జీశాట్-6ఎ ఉపగ్రహం జీశాట్-6ను పోలి ఉంటుంది.. అయితే దీనిలో కొన్ని మార్పులు చేశామని ఇస్రో అధికారులు తెలిపారు. రాకెట్ రెండో దశలో అధిక విస్పోటనం కలిగిన వికాస్ ఇంజిన్, ఎలక్ట్రోమెకానికల్ ఆక్టేషన్ వ్యవస్థను ఏర్పాటు చేసినట్టు తెలియజేశారు.
|
|
