కామన్వెల్త్ క్రీడా గ్రామంలో సైనాకి చేదు అనుభవం
Telangana Telugu | Suryaa Desk | Published : Tue, Apr 03, 2018, 09:31 AM
భారత స్టార్ షట్లర్ సైనా నెహ్వాల్కి కామన్వెల్త్ క్రీడా గ్రామంలో చేదు అనుభవం ఎదురైంది. బుధవారం నుంచి ఆస్ట్రేలియా వేదికగా కామన్వెల్త్ గేమ్స్ ప్రారంభంకానుండగా.. సోమవారం తన తండ్రితో కలిసి సైనా అక్కడికి వెళ్లింది. అయితే ఆమె తండ్రిని గ్రామంలోకి అధికారులు అనుమతించలేదు. రెండు వారాల క్రితం క్రీడాకారులతో పాటు వారి కుటుంబ సభ్యుల్ని కామన్వెల్త్ గేమ్స్కి అనుమతించబోమని కేంద్ర ప్రభుత్వం చెప్పగా.. దీనిపై పెద్ద ఎత్తున విమర్శలు చెలరేగాయి. దీంతో.. వెనక్కి తగ్గిన ప్రభుత్వం పీవీ సింధు వాళ్ల అమ్మ, సైనా నెహ్వాల్ తండ్రి హర్వీర్ సింగ్కి అనుమతి ఇచ్చారు.
‘కామన్వెల్త్ గ్రామంలోకి మా నాన్నని అనుమతించకపోవడం ఆశ్చర్యానికి గురిచేసింది. జట్టు అధికారిక జాబితాలో ఆయన పేరు ఉంది. ఆయన ఖర్చులన్నీ నేనే వ్యక్తిగతంగా భరిస్తున్నా. అయినప్పటికీ క్రీడాగ్రామానికి వచ్చేసరికి జాబితాలో ఆయన పేరుని తొలగించారు. దీంతో.. నా తండ్రి నాతో కలిసి ఉండలేరు. నా మ్యాచ్లను చూడలేరు. కనీసం క్రీడాగ్రామంలోకి ప్రవేశించి నాతో మాట్లాడలేరు. ప్రతి పోటీకి ఆయనని నా వెంట ఉంటారు. ఆయన సహకారం చాలా అవసరం. కానీ.. అధికారులు నాతో కనీసం మాటమాత్రమైనా చెప్పకుండా ఇలా చేయడం భావ్యం కాదు’ అని సైనా నెహ్వాల్ ఉద్వేగంగా ట్వీట్ చేశారు. పీవీ సింధు తల్లిని మాత్రం ఆమెతో క్రీడాగ్రామంలోకి అధికారులు అనుమతించారు.
|
|
