వారికి వరాలు సరే.. మాకు ఉద్యోగాలేవి?
Telangana Telugu | Suryaa Desk | Published : Mon, Feb 27, 2017, 08:23 PM
తెలంగాణ ప్రభుత్వం తాజాగా అంగన్వాడీ కార్యకర్తల వేతనాలను రూ. 7000 నుంచి రూ. 10.500కు పెంచుతూ నిర్ణయం తీసుకుంది. అధికారంలో వచ్చిన తర్వాత కేసీఆర్ సర్కారు ఉద్యోగులకు 43 శాతం ఫిట్మెంట్ ప్రకటించింది. దీంతో ఉద్యోగులు, వారి కుటుంబ సభ్యులు హ్యాపీగా ఫీలయ్యారు. ఈ నిర్ణయం ఫలితంగా ఆంధ్ర ప్రభుత్వం కూడా తమ ఉద్యోగులకు కూడా భారీగా ఫిట్మెంట్ ప్రకటించింది. ఇదంతా బాగానే ఉంది కానీ.. తమ మాటేంటని నిరుద్యోగులు ప్రశ్నిస్తున్నారు. తెలంగాణ వస్తే లక్ష ఉద్యోగాలొస్తాయన్న చేసిన ప్రచారం అంతా ఉత్తిదేనా అని వాపోతున్నారు. ఓవైపు మూడు పదుల వయసు వస్తున్నా.. ఉద్యోగం వస్తేనే మూడు మూళ్లు అంటూ ఉద్యోగ సాధనలో ఉన్నవారు.. తీవ్ర వేదనకు గురవుతున్నారు.
ఇప్పటి దాకా తెలంగాణాలో ఇంజనీర్లకు సంబంధించిన పోస్టులు, పోలీస్, వెయ్యికిపైగా గ్రూప్-2 పోస్టులు మినహా మరో పెద్ద ఉద్యోగ ప్రకటన అంటూ రాలేదు. ప్రత్యేక రాష్ట్రం ఏర్పడి రెండున్నరేళ్లు దాటినా.. తమ బిడ్డల పరిస్థితి మారకపోవడంతో తల్లిదండ్రులు కూడా వేదనకు గురవుతున్నారు. గురుకులాల టీచర్ల నోటిఫికేషన్ వచ్చింది సరే.. మిగతా ప్రభుత్వ పాఠశాలల్లోని ఖాళీల నియామకం ఎప్పుడంటూ నిరుద్యోగులు గళం విప్పుతున్నారు. భారీ సంఖ్యలో టీచర్ పోస్టులకు ప్రకటన వెలువడే అవకాశం ఉందని చాలా కాలం కిందటే భావించారు. కానీ అది కార్యరూపం దాల్చలేదు. ఈ పరిణామాలే ప్రొఫెసర్ కోదండరాం ఆధ్వర్యంలో నిరుద్యోగుల ర్యాలీకి దారి తీశాయి.
|
|
