ఆస్కార్ అవార్డునే వద్దనుకున్నాడు!

ఆస్కార్ అనేది ప్రతి నటుడుకీ ఒక కలల అవార్డు. ముఖ్యంగా హాలీవుడ్ సినీ ప్రపంచంలో.. దాన్ని దక్కించుకోవడానికి ప్రతి ఒక్కరూ ప్రయత్నిస్తూనే ఉంటారు. కానీ అలాంటి అవార్డునే తనకు అక్కర్లేదంటూ ప్రకటించాడు ఓ ప్రముఖుడు. అవార్డ్ ఫంక్షన్‌ను బహిష్కరిస్తున్నట్లు ముందుగానే ప్రకటించాడు. అమెరికా అధ్యక్షుడు ట్రంప్‌పై కోపంతో.. చెప్పినట్లే ఆ ప్రతిష్టాత్మక కార్యక్రమానికి హాజరు కాలేదు. వివరాల్లోకి వెళితే..
ఇరానియన్ దర్శకుడు అస్ఘర్ ఫర్హాదీ తీసిన 'ది సేల్స్ మ్యాన్' సినిమాకు ఉత్తమ ఫారెన్ చిత్రం కేటగిరీలో ఆస్కార్ అవార్డు ప్రకటించారు. అకాడమీ బహుమతి వచ్చినా.. ముస్లిం దేశాలపై ట్రంప్ విధించిన బ్యాన్ పట్ల నిరసన వ్యక్తం చేస్తూ.. ఆయన ఈ కార్యక్రమానికి హాజరుకాలేదు. దానికి సంబంధించిన కారణాలను వివరిస్తూ ఆయన ఒక సందేశాన్ని పంపించారు. ఆ సందేశాన్ని అవార్డుల ప్రదానోత్సవ వేదికపై చదివి వినిపించారు నిర్వాహకులు.
రెండోసారి ఆయనకు ఈ అవార్డును ప్రకటించినందుకు నిర్వాహకులకు ధన్యవాదాలు చెబుతూనే.. ట్రంప్‌నకు చురకలంటించారు ఫర్హాదీ. ‘నా దేశంతో పాటు మరో 6 దేశాల పర్యాటకులకు సంబంధించి ట్రంప్ తీసుకున్న నిర్ణయం సరైంది కాదు. ప్రపంచ దేశాలను అమెరికా.. శత్రువులుగా విభజిస్తోంది. తద్వారా ఒక రకమైన భయాన్ని పెంచి పోషిస్తోంది. ఇది యుద్ధ కాంక్షతో కూడిన దాడి లాంటిది. ఈ యుద్ధాలు ప్రజాస్వామ్యాన్ని, మానవ హక్కులను హరిస్తాయి' అని ఆయన సందేశంలో పేర్కొన్నారు. అస్ఘర్ ఫర్హాదీకి 2011లోనూ విదేశీ చిత్రాల విభాగంలో ఆస్కార్ అవార్డ్ వచ్చింది.
మరోవైపు ఆస్కార్‌ వేడుకలకు కొందరు సెలబ్రిటీలు బ్లూ రిబ్బన్‌ ధరించి వచ్చారు. అమెరికాలోకి ఏడు ముస్లిం దేశాల ప్రజలను అడుగుపెట్టనీయకుండా ఆ దేశ అధ్యక్షుడు డొనాల్డ్‌ ట్రంప్‌ జారీ చేసిన నిషేధ ఉత్తర్వులను వ్యతిరేకిస్తూ.. వారు బ్లూ రిబ్బన్‌ పెట్టుకొని వచ్చారు.