భూ నిర్వాసితులకు భారీ పరిహారం
Telangana Telugu | Suryaa Desk | Published : Tue, Jul 11, 2017, 10:14 AM
రాష్ట్రంలో సాగునీటి ప్రాజెక్టులు, ఇతర మౌలిక సదుపాయాల కోసం చేపట్టే భూ సేకరణలో రైతులు, భూ యజమానులకు ఆమోదయోగ్యమైన పరిహారం ఇవ్వాలని ప్రభుత్వం నిర్ణయించింది. 2013 భూసేకరణ చట్టంకంటే ఎక్కువగా పరిహారం ఉండేలా నిర్ణయం తీసుకున్నది. ప్రభావిత కుటుంబాలు ప్రశాంతంగా జీవించేలా సకల వసతులతో పునరావాస గ్రామాలను ఏర్పాటు చేయనున్నారు. కొత్త భూసేకరణ సవరణ చట్టం అమలుకు ప్రాథమిక మార్గదర్శకాలను ప్రభుత్వం విడుదల చేసింది. ప్రభుత్వంలోని వివిధ శాఖలు చేపట్టే అభివృద్ధి కార్యక్రమాలు, ప్రాజెక్టులకు కావాల్సిన భూమిని సేకరించే బాధ్యతను జిల్లా కలెక్టర్లకు అప్పగించింది. కలెక్టర్లు సెక్షన్ 23-ఏ ప్రకారం ఏ భూమి కావాలని గుర్తిస్తారో ఆ భూమికి నోటిఫికేషన్ విడుదల చేస్తారు. ఈ భూమిని ఏ స్థాయిలోనైనా పరస్పర చర్చల ద్వారా సేకరించే అధికారం కలెక్టర్‌కు ఉంది. భూమిని ఇచ్చే వ్యక్తులకు ఫామ్-ఏ కింద కలెక్టర్ నోటీసులు ఇచ్చి, సంతకాలు తీసుకుంటారు. రైతులు, భూమి యజమానులతో చర్చల కోసం కలెక్టర్ నేతృత్వంలో కమిటీ ఏర్పాటవుతుంది. కమిటీలో కలెక్టర్, జాయింట్ కలెక్టర్, డిప్యూటీ కలెక్టర్-ఆర్డీవో, వర్క్ ఏజెన్సీ ఎగ్జిక్యూటివ్ ఇంజినీర్, భూమి అవసరం ఉన్న సంబంధిత శాఖ ప్రతినిధి ఉంటారు. భూమిని కోల్పోతున్న రైతులు, భూ యజమానులతో వీరంతా చర్చించి, వారి అంగీకారం మేరకు పరిహారం ఇస్తారు.
|
|
