కరీంనగర్ జిల్లా కారాగారంలో ఉన్న సిరిసిల్ల బాధితుల ను పరామర్శ

తెలంగాణలోని సిరిసిల్ల జిల్లా నేరెళ్ల, జిల్లెల బాధితులను లోక్‌సభ మాజీ స్పీకర్ మీరాకుమార్ పరామర్శించారు. బాధితుల రోదనలు చూసి చలించిపోయారు. కన్నీటి పర్యంతమయ్యారు. లారీ ఢీకొని మృతిచెందిన భూమయ్య కుటుంబంతో పాటు పోలీసులు అరెస్ట్ చేసి చిత్రహింసలకు గురిచేసిన వారి కుటుంబసభ్యలను కలిసి వారికి భరోసా ఇచ్చారు. ఇసుక లారీ ఢీకొని భూమయ్య మరణించడం.. ప్రజలు ఆగ్రహంతో లారీలు దహనంచేయడం.. అనంతరం పోలీసులు తమ వారిని తీసుకెళ్లి చిత్రహింసలు పెట్టిన తీరును బాధిత కుటుంబాల మహిళలు రోదిస్తూ మీరాకుమార్‌కు వివరించారు. వారి రోదనలు చూసి చలించిపోయిన ఆమె కన్నీటి పర్యంతమయ్యారు.

తమ భర్తలను పోలీస్ స్టేషన్‌కు తీసుకెళ్లి చిత్రహింసలు పెట్టడమే కాకుండా, తమపై బ్రోతల్ కేసులు పెడతామని భయపెట్టారని, కులం పేరుతో దూషించారని మహిళలు ఆవేదన వ్యక్తం చేశారు. దీంతో మీరాకుమార్ పక్కనే ఉన్న మాజీమంత్రి గీతారెడ్డి కూడా కన్నీరు పెట్టుకున్నారు. మృతుల కుటుంబాలకు అండగా ఉండడంతో పాటు బాధితులకు వైద్య పరీక్షలు, వారి పిల్లలకు ఉన్నత విద్యను అందించేందుకు కాంగ్రెస్‌ పార్టీ తరఫున సాయమందిస్తామని మీరాకుమార్‌ హామీ ఇచ్చారు. ఇసుక లారీలు ఢీకొని మృతిచెందిన భూమయ్య, కరుణాకర్‌ కుటుంబాలకు రూ.50 వేల చొప్పున, ఇతర బాధిత కుటుంబాలకు రూ.25 వేలు చొప్పున మొత్తం రూ. 3 లక్షల ఆర్థికసాయాన్ని ఆమె అందజేశారు.

నేరెళ్ల ఘటనకు నిరసనగా కాంగ్రెస్ పార్టీ ‘చలో సిరిసిల్ల’కు పిలుపునిచ్చిన సంగతి తెలిసిందే. అక్కడ బహిరంగ సభకు పోలీసులు అనుమతి ఇవ్వలేదు. అయినా సభను జరిపి తీరతామని కాంగ్రెస్ పార్టీ తేల్చి చెప్పింది. దీంతో ఎక్కడికక్కడ కాంగ్రెస్ కార్యకర్తలను పోలీసులు అరెస్టులు చేశారు. మరోవైపు సిరిసిల్ల పర్యటనకు వచ్చిన మీరాకుమార్‌ను కూడా అరెస్టు చేస్తారనే ప్రచారం జోరుగా సాగింది. మీరాకుమార్, కాంగ్రెస్ నేతల పర్యటన నేపథ్యంలో ముగ్గరు ఎస్పీల సారథ్యంలో 600 మందికి పైగా పోలీసులతో సిరిసిల్ల జిల్లాలో భారీ బందోబస్తు ఏర్పాటు చేశారు. మొత్తానికి మీరాకుమార్ సిరిసిల్ల పర్యటన ప్రశాంతంగానే ముగిసింది.

పీసీసీ అధ్యక్షుడు ఉత్తమ్‌కుమార్‌రెడ్డి, కార్యనిర్వాహక అధ్యక్షుడు భట్టి విక్రమార్క, సీఎల్పీ నేత జానారెడ్డిలతో కలిసి మీరాకుమార్.. నేరెళ్ల, జిల్లెల, రాంచంద్రాపూర్‌లకు చెందిన బాధితులను కరీంనగర్‌ జైలులో సోమవారం మధ్యాహ్నం పరామర్శించారు. అనంతరం కరీంనగర్‌లో విలేకరులతో మాట్లాడారు. తర్వాత నెరేళ్ల, జిల్లెలలో బాధితులను పరామర్శించి మాట్లాడారు. బాధితులకు న్యాయం జరిగే వరకూ పోరాటం కొనసాగిస్తామని ప్రకటించారు. తెలంగాణ వస్తే దళితులకు రెండు పడక గదుల ఇల్లు, మూడెకరాల భూమి వస్తుందనుకున్నానని.. కానీ ఇలా చిత్రహింసల పాల్జేస్తారని, ఇలా బాధితుల్ని పరామర్శించేందుకు వచ్చే దుస్థితి తలెత్తుందని వూహించలేదని మీరాకుమార్ ఆవేదన వ్యక్తం చేశారు.