విక్రమ్ గౌడ్‌కి నో బెయిల్.. ఓన్లీ జైల్
Telangana Telugu | Suryaa Desk | Published : Fri, Aug 04, 2017, 08:27 AM
తనపై జరిగిన కాల్పుల కేసులో తానే ఏ1 నిందితుడిగా వున్న విక్రమ్ గౌడ్ బెయిల్ కోసం చేసుకున్న విజ్ఞప్తిని కొట్టేసిన నాంపల్లి కోర్టు.. అతడికి 14 రోజుల జుడీషియల్ రిమాండ్ విధించింది. దీంతో పోలీసులు విక్రమ్ గౌడ్‌ని చంచల్‌గూడ జైలుకి తరలించారు. జైలులో వున్న వైద్యులు విక్రమ్ గౌడ్‌కి పలు వైద్య పరీక్షలు నిర్వహించారు. విక్రమ్ గౌడ్‌కి అవసరమైన అన్ని రకాల వైద్య సదుపాయాలు, చికిత్స ఇక్కడే అందించడం జరుగుతుందని చంచల్‌గూడ జైలు సూపరింటెండెంట్ సైదయ్య తెలిపారు. ఒకవేళ జైలులో విక్రమ్ గౌడ్‌కి అవసరమైన వైద్య సహాయం అందించలేని పక్షంలో అతడిని ఉస్మానియా ఆస్పత్రికి కానీ లేదా గాంధీ ఆస్పత్రికి కానీ తీసుకువెళ్లడం జరుగుతుంది అని సూపరిటెండెంట్ సైదయ్య స్పష్టంచేశారు.
తనపై హత్యాయత్నం జరిగిందని అందరినీ నమ్మించడానికి తనపై కాల్పులకి పాల్పడమని ఆదేశిస్తూ ఓ సుపారీ బ్యాచ్‌కి సుపారీ ఇచ్చాడనేది ప్రస్తుతం విక్రమ్ గౌడ్‌‌పై నమోదైన ప్రధానమైన అభియోగం. దీంతో కాల్పుల్లో గాయపడిన విక్రమ్ గౌడ్‌ని ఆస్పత్రిలో కోలుకున్న వెంటనే ఇవాళ మధ్యాహ్నం అరెస్ట్ చేసిన బంజారాహిల్స్ పోలీసులు అతడిని కోర్టులో హాజరుపరిచిన సంగతి తెలిసిందే. ఈ కేసులో మొత్తం ఆరుగురిని అరెస్ట్ చేసిన పోలీసులు మరో ఇద్దరి కోసం గాలిస్తున్నారు.
|
|
