కేసీఆర్ కుటుంబం తప్ప తెలంగాణలో ఎవ్వరూ బాగు పడలేదు: బండి సంజయ్

స్వరాష్ట్రం, స్వపరిపాలన కావాలని పోరాటం చేస్తే.. కేవలం కేసీఆర్ కుటుంబం తప్ప తెలంగాణలో ఎవ్వరూ బాగు పడలేదని తెలంగాణ బీజేపీ అధ్యక్షుడు బండి సంజయ్ ఆరోపించారు. భూదాన్ పోచంపల్లిలో ఎంత మందికి డబుల్ బెడ్రూం ఇళ్లు వచ్చాయి.. ఎంతమంది యువతకు ఉద్యోగాలు వచ్చాయని బండి ప్రశ్నించారు. ఒక్క కేసీఆర్ ఇంట్లోనే ఐదుగురికి ఉద్యోగాలు వచ్చాయని వ్యాఖ్యానించారు. ఎన్నో త్యాగాలతో సాధించిన తెలంగాణ రాష్ట్రంలో.. ఏం సాధించామో ఒక్కసారి ఆలోచించాలని విజ్ఞప్తి చేశారు. ఎంతోమంది ప్రాణ త్యాగం చేస్తే.. తెలంగాణ రాష్ట్రం సిద్ధించిందని బండి సంజయ్ వివరించారు.

ఎంతో పోరాడి సాధించుకున్న తెలంగాణ రాష్ట్రంలో ఇప్పుడు ఏ వర్గం సంతోషంగా లేదని ఆయన వ్యాఖ్యానించారు. తెలంగాణ రాష్ట్రం సిద్దించాక ఏ వర్గానికి న్యాయం చేశారో చెప్పాలని డిమాండ్ చేశారు. ధనిక రాష్ట్రంగా ఉన్న తెలంగాణను అప్పుల కుప్పగా మార్చేశారని.. ఆఖరికి పుట్టబోయే బిడ్డపై కూడా లక్షా 20 వేల రూపాయల అప్పు చేసి పెట్టారని బండి సంజయ్ ఆరోపించారు. యాదాద్రి భువనగిరి జిల్లా భూదాన్ పోచంపల్లిలో బండి సంజయ్ ప్రజా సంగ్రామ యాత్రలో భాగంగా ఈ వ్యాఖ్యలు చేశారు.

షాదీ ముబారక్, కల్యాణలక్ష్మీ పథకాల కింది ఇచ్చే నగదు పెళ్లి సమయానికల్లా ఇవ్వాలి కానీ.. పెళ్లై పిల్లలు పుట్టాక ఇవ్వడం ఏంటని బండి సంజయ్  ప్రశ్నించారు. చేనేతల కోసం ఏ కార్యక్రమం చేపట్టినా.. వారిని బతికించడం కోసం చేయాలని బండి వ్యాఖ్యానించారు. బతికున్న చేనేత కార్మికులను మంచిగా చూసుకోవాల్సిన బాధ్యత ప్రభుత్వంపై ఉందన్నారు. చేనేత బీమా పథకానికి తాము వ్యతిరేకం కాదని.. స్పష్టం చేశారు. చేనేత కార్మికులకు ఇంకా ఎంతో తోడు అవసరం అని బండి సంజయ్ వ్యాఖ్యానించారు.

కేంద్ర ప్రభుత్వ పథకాలను ప్రజలకు వివరించడానికే ప్రజా సంగ్రామ యాత్ర నిర్వహిస్తున్నామని బండి సంజయ్ స్పష్టం చేశారు. బడుగు, బలహీన వర్గాల ప్రజలకు భరోసా కల్పించడానికే వచ్చామని వివరించారు. బంగారు తెలంగాణలో పేదల బతుకులు బాగుపడేలా చేస్తున్నామని స్పష్టం చేశారు. ప్రజా సంగ్రామ యాత్ర ఎందుకు చేస్తున్నారని టీఆర్ఎస్ నేతలు ప్రశ్నిస్తున్నారని.. అసలు ముఖ్యమంత్రి కేసీఆర్ ప్రజల్లో తిరిగితే.. తాము ఎందుకు రోడ్డెక్కుతామని బండి సంజయ్ వ్యాఖ్యానించారు.

తెలంగాణ రాష్ట్రం వచ్చాక కూడా.. రైతులు, నిరుద్యోగులు, చేనేత కార్మికులు ఎందుకు ఆత్మహత్య చేసుకుంటున్నారని బండి సంజయ్ ప్రశ్నించారు. కేసీఆర్ వ్యవహార శైలిని చూసి దేశంలోని ఇతర రాష్ట్రాల ముఖ్యమంత్రులు నవ్వుకుంటున్నారని బండి సంజయ్ ఎద్దేవా చేశారు. నీతి ఆయోగ్ సమావేశాన్ని బహిష్కరించడం ఏంటని ప్రశ్నించారు. యావత్ ప్రపంచం ప్రధాని మోదీని కీర్తిస్తుందని వ్యాఖ్యానించారు. పైసా అవినీతి లేకుండా పాలిస్తున్న నేత ప్రధాని మోదీ అని వివరించారు. కొవిడ్ కాలంలో కూడా.. పేదలకు భరోసా ఇచ్చింది ఎన్డీయే ప్రభుత్వమేనని స్పష్టం చేశారు.