6 గ్యారంటీలు అంటే 6 నెలలకి ఒక సీఎం.. కాంగ్రెస్‌ హామీలపై మంత్రి హరీష్ సెటైర్లు

తుక్కుగూడ విజయభేరి సభతో కాంగ్రెస్ పార్టీ ఎన్నికల శంఖారావం పూరించిన సంగతి తెలిసిందే. ఆ సభలో సోనియా గాంధీ అధికారంలోకి వస్తే అమలు చేయబోయే 6 గ్యారంటీలను ప్రకటించారు. కాంగ్రెస్ పార్టీ హామీలపై అధికార బీఆర్ఎస్ నేతలు విమర్శలు గుప్పిస్తున్నారు. తాజాగా మంత్రి హరీష్ రావు స్పందించారు. కాంగ్రెస్ పార్టీ ప్రకటించిన 6 గ్యారెంటీల కార్డ్ సంతకం లేని పోస్ట్‌డేటెడ్ చెక్ లాంటిదని ఆయన ఎద్దేవా చేశారు. ఆ పార్టీ అధికారంలో ఉన్న రాష్ట్రాల్లో ఏమీ చేయకుండా తెలంగాణలో అమలు కాని హామీలు ఇస్తున్నారని విమర్శించారు. మెదక్ జిల్లా పెద్దశంకరంపేటలో డబుల్ బెడ్ రూమ్‎ ఇండ్లను ప్రారంభించిన మంత్రి హరీశ్‌ రావు.. లబ్ధిదారులకు ఇండ్ల పట్టాలను అందజేశారు. అనంతరం అక్కడ ఏర్పాటు చేసిన సభలో మాట్లాడిన ఆయన కాంగ్రెస్ పార్టీపై విమర్శలు గుప్పించారు.

'గద్దెనెక్కే వరకు కాంగ్రెస్‌ వాళ్లు ఏదైనా చెబుతారు. అధికారం కోసం డ్రామాలు ఆడుతున్నారు. అధికారంలోకి రామని తెలిసి ఏదైనా మాట్లాడి ప్రజల్ని మోసం చేస్తున్నారు. 6 గ్యారెంటీ హామీలు అని చెబుతున్న కాంగ్రెస్ అధికారంలోకి వస్తే 6 నెలలకు ఒక సీఎం వస్తాడు. హైదరాబాద్‎లో ప్రతి 6 నెలలకు ఒకసారి కర్ఫ్యూ వస్తుంది. 24 గంటల కరెంట్ పోయి రోజుకు ఆరు గంటల కరెంట్ మాత్రమే వస్తుంది. వారానికి రెండు రోజుల పవర్ హాలిడే ఇస్తారు.' అని మంత్రి హరీష్ రావు విమర్శించారు. కాంగ్రెస్ వాళ్లకు కొత్తగా బెంగుళూరు హై కమాండ్ వచ్చిందని హరీష్ ఎద్దేవా చేశారు. బెంగుళూరును తెలంగాణకు రెండో రాజధాని చేస్తారు కావొచ్చునని అన్నారు. ఇకపై ఢిల్లీకి వెళ్లాలంటే బెంగుళూరు మీదుగా వెళ్లాల్సి వస్తుందేమోనని ఎద్దేవా చేశారు. 'కాంగ్రెస్ నాయకులు అబద్ధాలు ప్రచారం చేస్తున్నారు. వారి బోనస్ మాటలు నమ్మి అగం కావొద్దు. కన్నతల్లికి అన్నం పెట్టలేనోడు.. పినతల్లికి బంగారు గాజులు కొనిస్తా అన్నట్టు కాంగ్రెస్ పార్టీ తీరు ఉంది. ఎంత సేపు కేసీఆర్‎ని తిట్టుడే తప్ప వాళ్లకు మరో పనిలేదు. కేసీఆర్ అంటే నమ్మకానికి మారుపేరు. చెప్పిన ప్రతి మాటను నిలబెట్టుకున్న వ్యక్తి సీఎం కేసీఆర్.' అని తెలిపారు. రూపాయి ఖర్చు లేకుండా డబుల్ బెడ్ రూమ్ ఇండ్లు కట్టించి ఇచ్చామని మంత్రి హరీష్ వెల్లడించారు. పనిచేసే ప్రభుత్వాన్ని మరోసారి ఆశీర్వదించాలని ప్రజలను విజ్ఞప్తి చేశారు. బీఆర్ఎస్ మేనిఫెస్టో గొప్పగా ఉంటదని, చెప్పిన ప్రతి హామీ నెరవేర్చామన్నారు. త్వరలోనే పార్టీ మేనిఫెస్టో విడుదల చేస్తామన్నారు.