రేషన్‌కార్డు ఉన్నవారికి అలర్ట్.. మరో అవకాశం కల్పించిన సర్కార్, వెంటనే చేసేయండి

సంక్షేమ పథకాలు అర్హులకే అందించడానికి కేంద్ర, రాష్ట్ర ప్రభుత్వాలు పకడ్బందీగా చర్యలు చేపడుతోంది. ప్రధానంగా పేదలకు అందాల్సిన రేషన్ సరుకులు పక్కదారి పట్టకుండా అర్హులకే అందే విధంగా కఠిన చర్యలు తీసుకుంటున్నారు. అందులో భాగంగానే రేషన్‌ కార్డులకు ఈ కేవైసీ తప్పనిసరి చేసింది. దీని కోసం అవగాహన కార్యక్రమాలు సైతం చేపట్టారు. అందుబాటులో ఉన్న రేషన్‌ దుకాణాలకు వెళ్లి ఈ-కేవైసీ చేసుకోవాలని పౌరసరఫరాల అధికారులు ప్రజలకు సూచించారు. వేలి ముద్రల ఆధారంగా కుటుంబంలో సభ్యుడా? కాదా? అనే విషయాలను ఈ కేవైసీ ద్వారా గుర్తించనున్నారు. తద్వారా రేషన్ బియ్యం సహా సరుకులు సక్రమంగా అర్హులకు అందే విధంగా చర్యలు తీసుకుంటున్నారు.

ఈ కేవైసీ ఎప్పట్నుంచో చేస్తున్నా.. వేలిముద్రలు పడక, సాంకేతిక సమస్యలతో జాప్యం జరుగుతోంది. చిన్నారుల ఆధార్‌ అప్డేట్ కాకపోవడంతో ఇబ్బందులు తలెత్తుతున్నాయి. పలువురు వృద్ధుల వేలిముద్రలు పడడం లేదు. మీసేవా, ఆధార్‌ కేంద్రాలకు వెళ్లి అప్టేట్ పూర్తి చేసుకున్నా ఈ-కేవైసీ ప్రక్రియలో వేలిముద్రలు రావడం లేదు. వలస వెళ్లిన వారి కోసం అక్కడ ఉండే రేషన్‌ షాపుల్లో ఈ-కేవైసీ చేసుకునే వెసులుబాటు ఉన్నా.. కొందరు డీలర్లు తమ పరిధిలోని వారికే ఈ కేవైసీ ప్రక్రియను చేస్తున్నారు. జిల్లాలో పలు చోట్ల రేషన్‌ డీలర్లు ఈ-కేవైసీ కోసం డబ్బులు వసూలు చేస్తున్నారనే ఆరోపణలు కూడా ఉన్నాయి. ఇలా చాలా మంది ఇప్పటికి ఈ కేవేసీ పూర్తి చేసుకోలేదు. లబ్ధిదారుల్లో 74.6 శాతం మాత్రమే ఇప్పటి వరకు నమోదు చేసుకున్నట్లు ప్రభుత్వం గుర్తించింది.

ఈ నేపథ్యంలో రేషన్‌ కార్డుల ఈ-కేవైసీ నమోదుకు ప్రభుత్వం మరో అవకాశం కల్పించింది. ఫిబ్రవరి 29తో గడువు ముగిసినప్పటికి.. రేషన్‌ దుకాణాల్లో ఈ-కేవైసీ ప్రక్రియ ఇంకా కొనసాగుతూనే ఉంది. రేషన్‌ డీలర్ల వద్దకు వెళ్లి ఈ కేవైసీ పూర్తి చేసుకోవాలని సివిల్ సప్లయ్ అధికారులు సూచిస్తున్నారు. ప్రస్తుతానికి ప్రభుత్వం తుది గడువు విధించలేదని.. విధించేలోపు ప్రక్రియను పూర్తి చేసుకోవాలని చెబుతున్నారు.