కొత్తగా వెహికల్ కొంటున్నారా..? తెలంగాణ సర్కార్ బ్యాడ్‌న్యూస్, జేబుకు చిల్లే.

కొత్తగా వాహనాలు కొనాలనుకునే వారికి నిజంగా ఇది బ్యాడ్‌న్యూసే. కొత్త వాహనాలకు వాటిని కొనుగోలు చేసే సమయంలోనే రోడ్ ట్యాక్స్ విధిస్తారు. అయితే రాష్ట్రంలో పెట్రోల్, డీజిల్‌తో నడిచే వాహనాలకు విధించే రోడ్‌ ట్యాక్స్‌ విషయంలో రేవంత్ ప్రభుత్వం కీలక నిర్ణయం తీసుకునే అవకాశాలున్నట్లు అధికార వర్గాల నుంచి సమాచారం. ఇతర రాష్ట్రాల్లో వాహనాల ద్వారా రవాణాశాఖకు వస్తున్న ఆదాయం, రిజిస్ట్రేషన్‌ విధానం తదితర అంశాలపై అధికారులు కొద్దివారాల క్రితం అధ్యయనం చేశారు. ఇతర రాష్ట్రాల్లో రోడ్‌ ట్యాక్స్‌ గణాంకాల్ని మన రాష్ట్రంలోని వాహనాలతో వచ్చే ఆదాయం, పన్నుల శ్లాబుల్ని బేరీజు వేశారు. ఈ వివరాలతో అధికారులు ఓ నివేదిక సైతం రూపొందించారు.

ఈ నివేదికను త్వరలోనే మంత్రివర్గ ఉపసంఘానికి సమర్పించనున్నట్లు సమాచారం. కేబినెట్ సబ్ కమిటీ చర్చించి రోడ్‌ ట్యాక్స్‌పై ఓ నిర్ణయం తీసుకోనున్నట్లు తెలిసింది. పెట్రోలు, డీజిల్‌తో నడిచే కొత్త వాహనాలకు సంబంధించి.. బైకులు వంటి టూ వీలర్లకు 2, ఫోర్‌ వీలర్లకు 4 రకాల రోడ్‌ ట్యాక్స్‌ శ్లాబులు ఉండగా.. ఈ సంఖ్యను కుదించాలన్న యోచనలో తెలంగాణ రవాణాశాఖ ఉన్నట్లు తెలిసింది. దాంతో పాటుగా వెహికల్ రిజిస్ట్రేషన్‌లో కీలకమైన రోడ్‌ ట్యాక్స్‌ను కొంతమేర పెంచే అవకాశం ఉన్నట్లు సమాచారం. రూ.లక్షపైన విలువున్న టూ వీలర్లకు, రూ.10 లక్షలపైన ఉన్న కార్లకు రోడ్డు ట్యాక్స్‌ పెరిగే ఛాన్స్ ఉన్నట్లు సమాచారం.

కొన్ని రాష్ట్రాల్లో రవాణా ఆదాయం అధికంగా రావడానికి రోడ్‌ ట్యాక్స్‌ ద్వారానే వస్తున్నట్లు గుర్తించారు. కేరళలో గరిష్ఠంగా 21%, తమిళనాడులో 20 శాతంగా రోడ్ ట్యాక్స్ వసూలు చేస్తున్నట్లు అధ్యయనంలో తేలింది. వెహికల్ మోడల్, ధరను బట్టి రాష్ట్రంలో గతంలో 12-14-18 శాతాలతో 3 రకాల రోడ్‌ ట్యాక్స్‌ శ్లాబులుండేవి. అయితే 2022లో రోడ్‌ ట్యాక్స్‌ను పెంచుతూ అప్పటి ప్రభుత్వం శ్లాబుల్లో మార్పులు చేసింది. ప్రస్తుతం తెలంగాణ రవాణాశాఖ ఆదాయంలో దాదాపు 65-70 శాతం వరకు రోడ్‌ ట్యాక్స్‌ ద్వారానే సమకూరుతోంది. రోడ్‌ ట్యాక్స్‌ పెంచడంతో 2022-23లో రూ.6,390.80 కోట్ల ఆదాయం వచ్చింది. తాజాగా రోడ్‌ ట్యాక్స్‌ పెంచితే అదనంగా కనీసం రూ.2 వేల కోట్లకుపైగా ఆదాయం వస్తుందని రవాణాశాఖ అంచనా వేస్తోంది.

తెలంగాణలో ప్రస్తుతం కార్లకు సంబంధించి వాహన ధర రూ.5 లక్షల లోపు ఉంటే 13 శాతం, రూ.5-10 లక్షల మధ్య అయితే 14 శాథం, రూ.10-20 లక్షల మధ్య 17 శాతం, రూ.20 లక్షలు ఆపైన 18 శాతం రోడ్ ట్యాక్స్ వసూలు చేస్తున్నారు. బైకులకు సంబంధించి రాష్ట్రంలో రూ.50 వేల లోపు వాహనాలకు 9 శాతం, ఆపై విలువ ఉంటే 12 శాతం రోడ్‌ ట్యాక్స్‌ వసూల చేస్తున్నారు. కర్ణాటకలో రూ.లక్ష పైన వాహనాలకు 18 శాతం, కేరళలో రూ.2 లక్షలపైన విలువైన ద్విచక్రవాహనాలకు 21 శాతం పన్ను విధిస్తున్నారు. ఇదే విధానంలో తెలంగాణలోనూ పన్నులు పెరిగే ఛాన్స్ ఉంది. అదే జరిగితే వాహనదారుల జేబుకు చిల్లు పడనుంది.