తెలంగాణ సూపర్ గేమ్ ఛేంజర్ రీజినల్ రింగు రోడ్డు... రేవంత్ సర్కార్ కీలక నిర్ణయం

హైదరాబాద్ నగరాన్ని, తెలంగాణను మరింత వేగంగా, అంతర్జాతీయ స్థాయిలో అభివృద్ధి చేయటానికి రీజినల్ రింగు రోడ్డు (RRR) నిర్మించేందుకు ప్రభుత్వం సిద్ధమైన సంగతి తెలిసిందే. ప్రస్తుతం హైదరాబాద్ నగరం చుట్టూ ఉన్న ఔటర్ రింగు రోడ్డుకు 40. కి.మీ దూరం నుంచి ఈ ప్రతిపాదిత ప్రాజెక్టును నిర్మించనున్నారు. తెలంగాణ రాష్ట్రానికి ఇది సూపర్ గేమ్ ఛేంజర్ అని.. ఈ రోడ్డు అందుబాటులోకి వస్తే సగం తెలంగాణ అభివృద్ధి చెందుతుందని ప్రభుత్వ పెద్దలు అంటున్నారు. ఉత్తర, దక్షిణ రెండు భాగాలుగా నిర్మిస్తున్న ఈ ప్రాజెక్టులో ఉత్తర భాగానికి ఇప్పటికే కేంద్రం నుంచి నేషనల్ హైవే హోదా లభించింది. దక్షిణ భాగం అలైన్‌మెంట్‌ విషయంలో ప్రస్తుతం కసర్తతు జరుగుతోంది.

 కాగా, ఆర్‌ఆర్‌ఆర్‌ దక్షిణ భాగం పనులపై రేవంత్ సర్కార్ కీలక నిర్ణయం తీసుకుంది. సాధ్యమైనంత త్వరగా చేపట్టాలని రేవంత్ సర్కార్ భావిస్తోంది. ఆర్‌ఆర్‌ఆర్‌ ఉత్తర భాగం పనులను కేంద్రం చేపట్టనుండగా.. ఇప్పటికే సంబంధిత డీపీఆర్‌ను కన్సల్టెంట్‌ సంస్థ NHAIకు సమర్పించింది. ఉత్తర భాగానికి సమాంతరంగా దక్షిణ భాగం పనులు కూడా చేపట్టేందుకు రేవంత్ ప్రభుత్వం రెడీ అయింది. డిసెంబర్ మొదటి వారంలో ఆర్‌ఆర్‌ఆర్‌పై సీఎం రేవంత్ రెడ్డి సమీక్ష నిర్వహించే అవకాశాలు ఉన్నాయి. సమీక్ష తర్వాత దక్షిణ భాగం పనులపై పూర్తిస్థాయిలో స్పష్టత వచ్చే ఛాన్స్ ఉంది.

తెలంగాణ ప్రభుత్వం ప్రతిష్ఠాత్మకంగా నిర్మిస్తున్న ఫోర్త్ సిటీ, శంషాబాద్ ఎయిర్‌పోర్టుకు అనుసంధానంగా ఆర్ఆర్ఆర్ దక్షిణ భాగం నిర్మించనున్నారు. ఇప్పటికే దక్షిణ భాగం డీపీఆర్‌ కోసం కన్సల్టెంట్‌ సంస్థ నియామకానికి రేవంత్ సర్కార్ ఉత్తర్వులు జారీచేసింది. ఉత్తరభాగంలో ఇప్పటికే 94 శాతం భూసేకరణ పూర్తిచేశారు. మొత్తం 1,895 హెక్టార్ల భూమి అవసరం కాగా.. 1,862 హెక్టార్ల భూమి కోసం తాజాగా ప్రభుత్వం నోటిఫికేషన్‌ జారీ చేసింది. ఈ భాగం సంగారెడ్డి, నర్సాపూర్, తూప్రాన్, గజ్వేల్, జగదేవ్‌పూర్, భువనగిరి, చౌటుప్పల్‌ వరకు 161.59 కిలోమీటర్ల మేర కొనసాగనుంది. దక్షిణ భాగం చౌటుప్పల్, ఆమన్‌గల్, షాద్‌నగర్, చేవెళ్ల, సంగారెడ్డి వరకు 189.20 కి.మీ. నిర్మించనున్నారు.

ఉత్తర భాగాన్ని మొత్తం ఆరు ప్యాకేజీల్లో పనులను చేపట్టాలని ఎన్‌హెచ్‌ఏఐ సూచించింది. దీనికి కేంద్రం జనవరిలో టెండర్లు పిలిచే అవకాశాలు ఉన్నట్లు తెలిసింది. ఉత్తర భాగానికి సమాంతరంగా దక్షిణ భాగం పనులను ముందుకు తీసుకెళ్లేందుకు రేవంత్ సర్కార్ ప్రణాళికలకు రూపకల్పన చేస్తోంది. ఒకవేళ కేంద్రం ఉత్తరభాగం టెండర్లను పిలవడంలో ఆలస్యం చేస్తే ఏం చేయాలనే దానిపై కూడా రేవంత్ సర్కార్ సమాలోచనలు చేస్తున్నట్లు తెలిసింది.