తెలంగాణలో చలిపులి పంజా.. మూడు జిల్లాలకు ఆరెంజ్‌ అలర్ట్, జాగ్రత్తలు తీసుకోండి

తెలంగాణలో చలిపులి పంజా విసురుతోంది. చాలా ప్రాంతాల్లో కనిష్ఠ ఉష్ణోగ్రతలు నమోదవుతున్నాయి. గత వారం రోజులుగా రాష్ట్రంలో వాతావరణం పూర్తిగా మారిపోయింది. పల్లె, పట్నం తేడా లేకుండా రాష్ట్రాన్ని చలి గజగజ వణికిస్తోంది. తెలంగాణ వ్యాప్తంగా అన్ని జిల్లాల్లో 15 డిగ్రీలలోపు కనిష్ఠ ఉష్ణోగ్రతలు నమోదవుతున్నట్లు వాతావరణశాఖ అధికారులు వెల్లడించారు. ఉత్తర, మధ్య తెలంగాణ జిల్లాల్లో చలి తీవ్రత ఎక్కువగా ఉందని చెబుతున్నారు. కుమురం భీం ఆసిఫాబాద్‌ జిల్లాలో రాష్ట్రంలోనే అత్యంత కనిష్ఠ ఉష్ణోగ్రతలు రికార్డవుతున్నాయి. సిర్పూర్‌ (U)లో రికార్డు స్థాయిలో 9.4 డిగ్రీల సెల్సియస్‌ ఉష్ణోగ్రత నమోదైనట్లు అధికారులు వెల్లడించారు. సంగారెడ్డి జిల్లా కోహీర్‌లో అత్యల్పంగా 9.9 డిగ్రీలు నమోదైంది.

 తూర్పు, ఈశాన్య ప్రాంతాల నుంచి రాష్ట్రం వైపు గాలులు వీస్తుండటమే చలి తీవ్రత పెరగటానికి కారణమని వాతావరణ శాఖ అధికారులు తెలిపారు. తెలంగాణ వ్యాప్తంగా రానున్న మూడ్రోజులు చలి తీవ్రత మరింత అధికంగా ఉంటుందని వాతావరణ శాఖ అధికారులు అంచనా వేస్తున్నారు. కుమురం భీం ఆసిఫాబాద్, ఆదిలాబాద్, నిర్మల్‌ జిల్లాల్లో 10 డిగ్రీల లోపు కనిష్ఠ ఉష్ణోగ్రతలు నమోదయ్యే ఛాన్స్ ఉందన్నారు. ఈ మేరకు ఆయా జిల్లాలకు ఆరెంజ్‌ అలర్ట్ జారీ చేశారు. మిగిలిన 30 జిల్లాల్లో 15 డిగ్రీల లోపు కనిష్ఠ ఉష్ణోగ్రతలు నమోదవుతాయని ఈమేరకు ఎల్లో అలర్ట్ జారీ చేశారు.

చలి తీవ్రత పెరుగుతున్న నేపథ్యంలో ప్రజలు తగిన జాగ్రత్తలు తీసుకోవాలని డాక్టర్లు సూచిస్తున్నారు. చిన్న పిల్లలు, వృద్ధులు, బాలింతలు, గర్భిణిలు, వ్యాధులతో బాధపడుతున్నవారు మరింత అప్రమత్తంగా ఉండాలని చెబుతున్నారు. ఉదయం, రాత్రి వేళల్లో ప్రయాణాలు మానుకోవటమే ఉత్తమని అంటున్నారు. వేడి వేడి ఆహారం మాత్రమే తీసుకోవాలని.. గోరు వెచ్చని నీటిని తాగితే ఉత్తమమని చెబుతున్నారు. ఏజెన్సీ ప్రాంతాల వారు వెచ్చని వాతావరణంలో ఉండేలా జాగ్రత్తలు తీసుకోవాలని.. చలిని తట్టుకునేలా వెచ్చని ఉన్ని దుస్తులు ధరించాలని సూచిస్తున్నారు. చలితోపాటు ఈదురు గాలులు వీచే అవకాశాలు ఉన్న నేపథ్యంలో మరింత అప్రమత్తంగా ఉండాలని చెబుతున్నారు.

అయితే ప్రతి ఏడాది డిసెంబరు మాసంలో ఉష్ణోగ్రతలు అత్యంత తక్కువ స్థాయికి పడిపోతుంటాయి. అయితే ఈ ఏడాది కొన్ని జిల్లాల్లో నవంబరులోనే చలి తీవ్రత విపరీతంగా పెరిగింది. గత పదేళ్లతో పోల్చితే ఈ నెల 23వ తేదీ రాత్రి నాలుగు జిల్లాల్లో కనిష్ఠ ఉష్ణోగ్రతలు నమోదైనట్లు వాతావరణశాఖ అధికారులు తెలిపారు. రానున్న రోజుల్లో చలి తీవ్రత పెరిగే అవకాశం ఉన్న నేపథ్యంలో మరింత అప్రమత్తంగా ఉండాలని చెబుతున్నారు.