కశ్మీర్‌లో ఎన్‌కౌంటర్

జమ్మూ కశ్మీర్‌లోని సోఫియాన్ జిల్లా పింజూర ప్రాంతంలో ఆదివారం రాత్రి సైన్యం జరిపిన కాల్పుల్లో నలుగురు ఉగ్రవాదులు హతమయ్యారు. పింజూర సైనిక చెక్‌పోస్ట్ సమీపంలోని సంయుక్త సైనిక పెట్రోలింగ్ వాహనంపై రాత్రి 8 గంటల ప్రాంతంలో ఉగ్రవాదులు కాల్పులకు పాల్పడటంతో సైన్యం ఎదురు కాల్పులు జరిపినట్టు ఆర్మీ అధికార ప్రతినిధి తెలియజేశారు. సోఫియాన్ జిల్లా పహ్నూ సైనిక స్థావరం సమీపంలో ఈ కాల్పులు చోటుచేసుకున్నాయి. దీంతో తీవ్రవాదుల కోసం గాలింపు ముమ్మరం చేయడంతో సైన్యంపై వారు కాల్పులు ప్రారంభించినట్లు జమ్మూ కశ్మీర్ పోలీస్ అధికారులు వెల్లడించారు. సైన్యం కాల్పుల్లో హతమైన నలుగురు ఉగ్రవాదుల్లో ఒకరు సోఫియాన్ జిల్లా జామ్నాగ్రీకి చెందిన ముస్తాఖ్ అహ్మద్ దర్ కుమారుడు షాహిత్ అహ్మద్ దర్‌‌గా గుర్తించారు. 

మిగతా ముగ్గురు సుహైల్ ఖలీల్ వాగే (పింజూర్), మహ్మద్ షాహిద్ ఖాన్ (మలిక్‌గుండ్), షాన్వాజ్ అహ్మద్ వాగే (త్రెంజ్)‌లుగా గుర్తించినట్టు ఆర్మీ అధికార ప్రతినిధి తెలిపారు. అయితే ఈ ముగ్గురూ ఉగ్రవాదులు కారని స్థానికులు వాదిస్తున్నారు. కారులో ప్రయాణిస్తోన్న వీరిపై సైన్యం కాల్పులు జరిపిందని ఆరోపించారు. గతవారం భద్రతా దళాల కాల్పుల్లో ఓ ఉగ్రవాది హతమైన విషయం తెలిసిందే. బందిపోర జిల్లా షక్రుద్దీన్ గ్రామంలో తీవ్రవాదులు తలదాచుకుంటున్నారనే నిఘా వర్గాల సమాచారంతో ఆర్మీ, సీఆర్పీఎఫ్, జమ్మూ కశ్మీర్ పోలీసులు సంయుక్తంగా సోదాలు నిర్వహించరు. ఈ సందర్భంగా సైన్యంపై ఉగ్రవాదులు కాల్పులు ప్రారంభించారు. దీంతో అప్రమత్తమైన సైన్యం వారిపై ఎదురు కాల్పులు జరిపి ఓ ఉగ్రవాదిని మట్టుబెట్టాయి.