నేడు తెలంగాణ బడ్జెట్

2018-19 ఆర్థిక సంవత్సరానికి గానూ బడ్జెట్‌కు తెలంగాణ రాష్ట్ర మంత్రివర్గం బుధవారం ఆమోదం తెలిపింది. ఈ ఏడాది బడ్జెట్‌ రూ.1.78 లక్షల కోట్ల వరకు ఉండొచ్చని భావిస్తున్నారు. గత బడ్జెట్‌తో పోలిస్తే 15-19 శాతానికి పెరిగే అవకాశం ఉంది. ఈ బడ్జెట్‌లో పెట్టుబడి సాయం, రైతు బీమా లాంటి కొత్త పథకాలను ప్రతిపాదించినట్టు సమాచారం. అలాగే ప్రజలందరికీ ఆరోగ్య కార్డుల్ని జారీ చేసే పథకం, బీసీలకు ప్రత్యేక అభివృద్ధి నిధి ఏర్పాటుకు కేటాయింపులు చేసే అవకాశం కూడా ఉంది. ఎస్సీ, ఎస్టీలకు ప్రస్తుతం అమలవుతున్న ప్రత్యేక అభివృద్ధి నిధుల కింద మరో 15 శాతం అదనంగా కేటాయింపులు పెరగనున్నాయి. సంక్షేమాన్ని, అభివృద్ధిని సమన్వయం చేసుకుంటూ రాష్ట్రాన్ని పురోగామి దిశగా తీసుకెళ్లేలా బడ్జెట్ రూపకల్పన చేసినట్టు ఆర్థిక మంత్రి ఈటల తెలిపారు. ప్రజా సంక్షేమమే లక్ష్యంగా బడ్జెట్‌ను రూపొందించినట్టు పేర్కొన్నారు.

తెలంగాణ ప్రభుత్వం ఆడంబరాలకు పోయి అప్పుల ఊబిలోకి నెట్టేస్తుందన్న విపక్షాల ఆరోపణల్లో నిజం లేదని ఆయన కొట్టిపారేశారు. ప్రజా సంక్షేమ కోసం చేసిన పథకాలు ఆడంబరమా అంటూ ప్రశ్నించారు. విపక్షాలు అవగాహనా రాహిత్యంతో మాట్లాడుతున్నాయని, మా ప్రభుత్వానికి సంకల్పబలం ఉందని అన్నారు. అంతేకాదు విపక్ష సభ్యులను మూకుమ్మడిగా బహిష్కరించడాన్ని సమర్థిస్తారా? అన్న ప్రశ్నకు ఈటల స్పందిస్తూ.. తమ ప్రభుత్వం తప్పుచేస్తే నిలదీయడానికి ప్రజలు అప్పగించిన బాధ్యతలను వారు నిర్వర్తించలేకపోయారని ఆయన విమర్శించారు. వాళ్లకు చర్చలు జరగడం, సమస్యల పరిష్కారమవడం ఇష్టంలేదని ఈటల ఆరోపించారు. కాంగ్రెస్ సభ్యుల సస్పెన్షన్ ఏకపక్ష నిర్ణయం కాదని అన్నారు.

గురువారం ఉదయం 11 గంటలకు అసెంబ్లీలో బడ్జెట్‌ను ప్రవేశపెట్టనున్నా రు. ప్రస్తుత బడ్జెట్‌ సమావేశాల్లోనే అనేక బిల్లులను ప్రభుత్వం ప్రవేశపెట్టబోతోంది. వాటికీ మంత్రివర్గం ఆమోదం వేసింది. వీటిలో ముఖ్యమైంది పరోక్ష ఎన్నికలకు పచ్చజెండా ఊపుతూ తయారైన పంచాయతీరాజ్‌ బిల్లు. ఇంటర్‌ వరకు తెలుగును తప్పనిసరి చేస్తూ మరో బిల్లును రూపొందించింది. పురపాలక శాఖకు సంబంధించి మరో బిల్లును ప్రభుత్వం ప్రవేశపెట్టనున్నట్లు సమాచారం.