దివ్యాంగుల వ‌స‌తి గృహానికి క‌డియం శంకుస్థాప‌న

హన్మకొండలోని సుబేదారి లో 1.22 కోట్ల రూపాయల అంచనా వ్యయంతో నిర్మించనున్న దివ్యాంగుల వసతి గృహానికి ఇవాళ డిప్యూటీ సీఎం క‌డియం శ్రీహ‌రి శంకుస్థాపన చేశారు. దివ్యాంగుల కు వసతి గృహాలు ఇంకా కిరాయి భవనాల్లో ఉండడం అని చెప్పడం నాకు బాధ అనిపించిందని మంత్రి క‌డియం అన్నారు. అందరికంటే ముందు పక్కా వసతి గృహాలు ఉండాల్సింది దివ్యాంగులకే అని ఆయ‌న వెల్ల‌డించారు. తెలంగాణ ప్రభుత్వం వచ్చాక దివ్యాంగుల పెన్షన్ ను 500 నుంచి 1500 కు పెంచామ‌న్నారు. దివ్యాంగుల ను పెళ్లి చేసుకునే సకలాంగులను ప్రోత్సహించడానికి ఇచ్చే ఆర్థిక ప్రోత్సాహం ను 50వేల నుంచి లక్ష రూపాయలకు పెంచామ‌న్నారు. ఉద్యోగాల్లో 4 శాతం, డబుల్ బెడ్ రూమ్ లలో 5 శాతం వారికి కేటాయించామన్నారు. వికలాంగుల సహకార సంస్థ చైర్మన్ వాసుదేవరెడ్డి, జడ్పీ చైర్ పర్సన్ గద్దల పద్మ, ఎమ్మెల్సీ శ్రీనివాస రెడ్డి, ఎమ్మెల్యేలు దాస్యం వినయ్ భాస్కర్, అరూరి రమేష్, మహిళా కోఆపరేటివ్ ఫైనాన్స్ కార్పొరేషన్ చైర్‌పర్సన్‌ గుండు సుధారాణి, కుడా చైర్మన్ మర్రి యాదవ రెడ్డి, వరంగల్ అర్బన్ కలెక్టర్ ఆమ్రపాలి, స్థానిక నేతలు, అధికారులు, ఈ కార్య‌క్ర‌మంలో పాల్గొన్నారు.

హాస్టళ్లలో అందరికి కామన్ మెనూ అమలు చేస్తున్నామని మంత్రి క‌డియం చెప్పారు. వారానికి 3 గుడ్లు , నెలకు 4సార్లు చికెన్, 2సార్లు మటన్, పాలు, టిఫిన్లు ఇస్తున్నామన్నారు. వీటితో పాటు నెయ్యి కూడా ఇస్తున్నామని, ఇక్కడ కూడా ఇస్తున్నారా? లేదా? అని అడిగారు. ఇవ్వడం లేదని చెప్పడంతో ఎందుకు ఇవ్వడం లేదని అధికారులని ప్రశ్నించి, వెంటనే ఇవ్వాలని మంత్రి ఆదేశించారు. ఈ రోజు ఈ భవనాన్ని 1.22 కోట్ల రూపాయలతో నిర్మించడానికి శంకుస్థాపన చేశామని, వచ్చే 6 నెలల్లో దీనిని పూర్తి చేయించే విధంగా ఛాలెంజ్ గా తీసుకుంటున్నామన్నారు. ఇక ఈ అసెంబ్లీ సమావేశాల్లో సీఎం కేసీఆర్ తో మాట్లాడి పది రోజుల్లో 18 హాస్టళ్లకు అనుమతులు ఇప్పించే విధంగా కృషి చేస్తానని చెప్పారు. అనుమతులు వచ్చిన తర్వాత రానున్న 9 నెలల్లో భవనాలు పూర్తి చేయించే విధంగా చర్యలు తీసుకుంటామని కడియం తెలిపారు. దివ్యాంగులు ఏ పరిస్థితుల్లో బాధ పడొద్దని మీకు అన్ని విధాలా సాయం చేసేందుకు తెలంగాణ ప్రభుత్వం అండగా ఉందన్నారు. ఈ భవనాన్ని 6 నెలల్లో పూర్తి చేసే విధంగా చర్యలు తీసుకోవాలని అధికారులను ఆదేశించారు.